امریکا ایران امن معاہدے کی امید، خام تیل کی قیمتوں میں 5 ڈالر کمی

عالمی منڈی میں پیر کے روز خام تیل کی قیمتوں میں 6 فیصد تک نمایاں کمی دیکھنے میں آئی، جس کی وجہ امریکہ اور ایران کے درمیان ممکنہ امن معاہدے سے متعلق بڑھتی ہوئی امیدیں قرار دی جا رہی ہیں، اگرچہ دونوں ممالک اب بھی اہم معاملات پر اختلافات رکھتے ہیں جن میں آبنائے ہرمز پر پابندیاں بھی شامل ہیں۔

برینٹ کروڈ فیوچرز 5.09 ڈالر یا 4.9 فیصد کمی کے ساتھ 98.45 ڈالر فی بیرل تک آ گئے، جبکہ امریکی ویسٹ ٹیکساس انٹرمیڈیٹ 5.22 ڈالر یا 5.4 فیصد کمی کے بعد 91.3 ڈالر فی بیرل پر ٹریڈ ہوئے۔ دونوں معیار تیل کی قیمتیں سیشن کے دوران 7 مئی کے بعد اپنی کم ترین سطح پر پہنچ گئیں۔

ہفتے کے روز امریکی صدر ڈونلڈ ٹرمپ نے کہا تھا کہ واشنگٹن اور ایران کے درمیان ایک امن معاہدے پر بڑی حد تک اتفاق ہو چکا ہے، جس کا مقصد آبنائے ہرمز کو دوبارہ کھولنا ہے، جو تنازع سے پہلے عالمی تیل اور ایل این جی کی ترسیل کا تقریباً 20 فیصد حصہ سنبھالتا تھا۔

مارکیٹ تجزیہ کاروں کے مطابق اگرچہ معاہدے کے حوالے سے امید پیدا ہوئی ہے، لیکن صورتحال اب بھی غیر یقینی ہے۔ ایم ایس ٹی مارکی کے تجزیہ کار سول کاووینک نے کہا کہ اگرچہ امن معاہدے کے امکانات موجود ہیں، تاہم قلیل مدت میں تیل کی قیمتوں میں کچھ ریلیف دیکھا جا سکتا ہے۔

تاہم فریقین کے درمیان متعدد اہم معاملات پر اختلافات برقرار ہیں۔ امریکی صدر نے اتوار کو کہا کہ انہوں نے اپنے نمائندوں کو ایران کے ساتھ کسی بھی معاہدے میں جلد بازی نہ کرنے کی ہدایت دی ہے۔

آئی این جی کے کموڈٹی اسٹریٹجی کے سربراہ وارن پیٹرسن کے مطابق مارکیٹ پہلے بھی ایسی صورتحال دیکھ چکی ہے، جہاں مذاکرات ناکام ہوئے، اس لیے سرمایہ کار محتاط رویہ اختیار کریں گے۔

تجزیہ کاروں کا کہنا ہے کہ آبنائے ہرمز سے تیل کی معمول کی ترسیل بحال ہونے میں کئی ماہ لگ سکتے ہیں کیونکہ متاثرہ آئل اور گیس انفراسٹرکچر کی مرمت جاری ہے۔

ادھر امریکی توانائی کمپنیوں نے بڑھتی ہوئی مقامی توانائی قیمتوں کے باعث مسلسل پانچویں ہفتے تیل اور گیس کے نئے رِگز شامل کیے ہیں، جو فروری 2025 کے بعد پہلی بار دیکھا گیا رجحان ہے۔ مجموعی رِگ کاؤنٹ 7 اضافے کے ساتھ 558 تک پہنچ گیا جو جون 2025 کے بعد بلند ترین سطح ہے۔

اگرچہ مجموعی تعداد گزشتہ سال کے مقابلے میں اب بھی 1 فیصد کم ہے، لیکن ماہرین کے مطابق مارکیٹ میں استحکام کے آثار موجود ہیں، تاہم اعتماد ابھی کمزور ہے۔