مشرق وسطی کشیدگی میں کمی کے بعد سونے کی قیمتیں مستحکم

سونے کی عالمی قیمتیں منگل کے روز مستحکم رہیں جبکہ امریکی ڈالر کی قدر میں کمی اور خام تیل کی قیمتوں میں 2 فیصد سے زائد گراوٹ کے بعد مارکیٹ میں غیر یقینی صورتحال کم ہوئی۔ یہ تبدیلی اس وقت سامنے آئی جب ڈونلڈ ٹرمپ نے ایران پر مجوزہ حملہ عارضی طور پر روکنے کا اعلان کیا، جس سے مشرقِ وسطیٰ میں طویل جنگ اور مہنگائی کے خدشات کم ہوئے۔

اسپاٹ گولڈ 4,565.40 ڈالر فی اونس پر مستحکم رہا، جبکہ گزشتہ سیشن میں یہ 30 مارچ کے بعد اپنی کم ترین سطح پر پہنچا تھا۔ جون کے لیے امریکی گولڈ فیوچرز 0.2 فیصد اضافے کے ساتھ 4,567.90 ڈالر تک پہنچ گئے۔ ڈالر کی قدر میں کمی کے باعث دیگر کرنسی رکھنے والوں کے لیے سونا نسبتاً سستا ہو گیا۔

خام تیل کی قیمتوں میں کمی نے بھی مارکیٹ پر اثر ڈالا، کیونکہ توانائی کی قیمتیں مہنگائی کو بڑھا سکتی ہیں۔ سونا عمومی طور پر مہنگائی کے خلاف محفوظ سرمایہ سمجھا جاتا ہے، تاہم بلند شرح سود اس کی طلب کو محدود کرتی ہے۔

مارکیٹ میں اس وقت توجہ امریکی فیڈرل ریزرو کی ممکنہ پالیسی تبدیلیوں پر ہے۔ توقع ہے کہ کیون وارش جمعہ کے روز امریکی مرکزی بینک کی قیادت سنبھالیں گے، جبکہ افراطِ زر کے دباؤ کے باعث شرح سود میں کمی کے امکانات محدود دکھائی دے رہے ہیں۔

دوسری جانب افریقی ملک گھانا نے بڑے پیمانے پر سونا نکالنے والی کمپنیوں کو ہدایت کی ہے کہ وہ اپنی سالانہ پیداوار کا 30 فیصد مرکزی بینک کو فروخت کریں، جو پہلے 20 فیصد تھی، تاکہ زرمبادلہ کے ذخائر مضبوط کیے جا سکیں۔

اسپاٹ سلور 0.3 فیصد کمی کے ساتھ 77.58 ڈالر فی اونس پر آ گیا، پلاٹینم 0.2 فیصد کمی سے 1,976.15 ڈالر اور پیلیڈیم 0.6 فیصد کمی کے ساتھ 1,409.75 ڈالر فی اونس پر ٹریڈ ہوا۔