مشرق وسطیٰ میں کشیدگی، سونے کی قیمتیں ڈیڑھ ماہ کی کم ترین سطح پر پہنچ گئیں

عالمی منڈی میں سونے کی قیمتیں پیر کے روز ایک ماہ سے زائد عرصے کی کم ترین سطح پر پہنچ گئیں، کیونکہ مشرق وسطیٰ میں بڑھتی ہوئی کشیدگی نے تیل کی قیمتوں میں اضافہ کیا، جس سے مہنگائی کے خدشات بڑھ گئے اور شرحِ سود کے طویل عرصے تک بلند رہنے کی توقعات کو تقویت ملی۔

اسپاٹ گولڈ 1.1 فیصد کمی کے بعد 4,488.99 ڈالر فی اونس پر آگیا، جو 30 مارچ کے بعد اس کی کم ترین سطح ہے۔ جون کے لیے امریکی سونے کے فیوچرز بھی 1.5 فیصد گر کر 4,493.30 ڈالر پر بند ہوئے۔

ماہرین کے مطابق سونا دباؤ کا شکار ہے کیونکہ خطے میں ڈرون حملے کے بعد متحدہ عرب امارات کے نیوکلیئر پلانٹ میں آگ لگنے کے واقعے نے خام تیل کی قیمتوں کو بڑھا دیا ہے، جس سے عالمی سطح پر مہنگائی کے خدشات میں اضافہ ہوا ہے۔

سعودی عرب نے بھی تین ڈرونز کو تباہ کرنے کا دعویٰ کیا ہے جبکہ امریکی صدر ڈونلڈ ٹرمپ نے ایران کو سخت پیغام دیتے ہوئے کہا ہے کہ اسے جلد اقدام کرنا ہوگا کیونکہ امریکا اور اسرائیل کے درمیان کشیدگی کم کرنے کی کوششیں تعطل کا شکار ہیں۔

تیل کی بڑھتی ہوئی قیمتوں کے باعث مارکیٹس میں توقع کی جا رہی ہے کہ امریکی فیڈرل ریزرو شرح سود کو طویل عرصے تک بلند رکھ سکتا ہے۔ سونا چونکہ منافع نہیں دیتا، اس لیے بلند شرح سود اس کی طلب کو کم کرتی ہے۔

سی ایم ای گروپ کے فیڈ واچ ٹول کے مطابق مارکیٹ میں دسمبر تک شرح سود میں اضافے کے 50 فیصد امکانات قیمتوں میں شامل کیے جا رہے ہیں۔ سرمایہ کار اس ہفتے فیڈ کی گزشتہ اجلاس کی منٹس کے منتظر ہیں تاکہ مانیٹری پالیسی کے بارے میں مزید اشارے مل سکیں۔

دوسری جانب چاندی 2.2 فیصد کمی کے ساتھ 74.30 ڈالر فی اونس پر آگئی، پلاٹینم 1,961.30 ڈالر اور پیلیڈیم 1.2 فیصد کمی کے بعد 1,396.25 ڈالر پر ٹریڈ ہوا۔