کویت کا پاکستان میں اسٹریٹجک آئل ذخائر منصوبوں کے جائزے پر اتفاق

کویت نے منگل کے روز پاکستان میں اسٹریٹجک آئل ذخائر کی تعمیر کے نئے مواقع تلاش کرنے پر اتفاق کیا، جس سے دونوں ممالک کو باہمی فائدہ حاصل ہو سکتا ہے۔

وزیرِ پیٹرولیم علی پرویز ملک نے منگل کو پاکستان میں تعینات ریاستِ کویت کے سفیر ناصر عبدالرحمن جاسم المطیری سے ملاقات کی۔ یہ بات ایک سرکاری بیان میں بتائی گئی۔

ملاقات میں علاقائی صورتحال، توانائی کے شعبے میں تعاون اور دوطرفہ تعلقات کو مزید مضبوط بنانے پر تبادلہ خیال کیا گیا۔ دونوں جانب سے باہمی دلچسپی کے شعبوں میں تعاون بڑھانے پر اتفاق کیا گیا۔

وزیرِ پیٹرولیم نے حکومتِ کویت کا شکریہ ادا کرتے ہوئے کہا کہ مشکل حالات میں ڈیزل کی فراہمی لے کر آنے والے جہاز خیرپور کی محفوظ روانگی کو یقینی بنانے میں کویت نے بروقت سہولت اور تعاون فراہم کیا۔

بیان کے مطابق وزیر پٹرولیم نے بتایا کہ آبنائے ہرمز کی بندش سے پیدا ہونے والی رکاوٹوں کے بعد خصوصی منظوریوں کے تحت یہ جہاز تقریباً 45 ہزار ٹن ڈیزل اور 10 ہزار ٹن جیٹ فیول لے کر کویت سے پاکستان پہنچا۔

علی پرویز ملک نے اس بات کا اعادہ کیا کہ پاکستان خطے میں امن اور استحکام کے لیے پرعزم ہے، جبکہ جاری تنازع کے اثرات نہ صرف خطے بلکہ دنیا کے دیگر حصوں میں بھی محسوس کیے جا رہے ہیں۔

انہوں نے کہا کہ فیلڈ مارشل عاصم منیر اور وزیراعظم پاکستان کی مشترکہ کوششوں سے خیرپور بحفاظت پاکستان پہنچنے میں کامیاب ہوا، جس سے ایندھن کی سپلائی کا تسلسل برقرار رکھنے اور قومی توانائی ضروریات پوری کرنے میں مدد ملی۔

دوسری جانب کویتی سفیر ناصر المطیری نے خطے میں امن کے لیے پاکستان کی کوششوں کو سراہتے ہوئے کہا کہ کویت پاکستان کو امن کے لیے اپنا مثبت کردار جاری رکھنے کی حوصلہ افزائی کرتا ہے۔

انہوں نے کہا کہ پاکستان نے اپنے ذمہ دارانہ مؤقف کے ذریعے خود کو ثابت کیا ہے اور اب عالمی برادری میں پاکستان کو ایک نئے اور بلند مقام سے دیکھا جا رہا ہے۔

دونوں فریقوں نے پیٹرولیم اور توانائی کے شعبوں، خصوصاً ریفائننگ سیکٹر میں تعاون بڑھانے کے امکانات پر بھی تبادلہ خیال کیا۔