غزہ پر اسرائیلی حملوں میں 3 افراد شہید، نازک جنگ بندی خطرے میں پڑ گئی

طبی حکام کے مطابق غزہ پر اسرائیلی حملوں میں کم از کم تین فلسطینی شہید ہو گئے، جن میں پولیس فورس کے دو اہلکار بھی شامل ہیں۔ تشدد کے ان تازہ واقعات نے امریکہ کی ثالثی میں ہونے والی جنگ بندی کی نزاکت کو مزید اجاگر کر دیا ہے۔

طبی عملے کا کہنا ہے کہ غزہ پٹی کے مغازی پناہ گزین کیمپ میں ایک فضائی حملے کے نتیجے میں ایک شخص شہید ہوا، جبکہ غزہ کی وزارتِ داخلہ کے مطابق ایک دوسرے حملے میں خان یونس کی کرمنل پولیس فورس کے سربراہ وسام عبدالہادی اور ان کے معاون مارے گئے۔

خبر رساں ادارے روئٹرز نے اس سے قبل بھی رپورٹ کیا تھا کہ اسرائیل نے غزہ کی پولیس فورس پر اپنے حملوں میں شدت پیدا کر دی ہے۔ اسرائیلی فوج نے فی الحال ان دونوں واقعات پر کوئی تبصرہ نہیں کیا ہے۔

مقامی طبی ماہرین کا کہنا ہے کہ جنگ بندی کے نفاذ سے اب تک کم از کم 850 فلسطینی شہید ہو چکے ہیں، جبکہ اسرائیل کا دعویٰ ہے کہ اسی دوران فلسطینی گروپوں نے اس کے چار فوجیوں کو ہلاک کیا ہے۔

غزہ کے محکمہ صحت کے حکام کے مطابق اکتوبر 2023 میں شروع ہونے والے غزہ بحران کے بعد سے اب تک مجموعی طور پر 72,500 سے زائد فلسطینی شہید ہو چکے ہیں، جن میں اکثریت عام شہریوں کی ہے۔