امریکا ایران کشیدگی میں اضافہ، خام تیل کی قیمتیں ایک فیصد سے زائد بڑھ گئیں

عالمی منڈی میں تیل کی قیمتوں میں جمعہ کو ایک فیصد سے زائد اضافہ ریکارڈ کیا گیا، جب امریکا اور ایران کے درمیان دوبارہ جھڑپیں شروع ہو گئیں، جس سے جنگ بندی خطرے میں پڑ گئی اور آبنائے ہرمز کی بحالی سے متعلق امیدوں کو دھچکا پہنچا۔ آبنائے ہرمز دنیا میں تیل اور گیس کی ترسیل کا ایک اہم راستہ سمجھی جاتی ہے۔

برینٹ خام تیل کے سودے 1.41 ڈالر یا 1.41 فیصد اضافے کے بعد 101.47 ڈالر فی بیرل تک پہنچ گئے، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت 1.12 ڈالر یا 1.18 فیصد اضافے سے 95.93 ڈالر فی بیرل ہوگئی۔ مارکیٹ کھلتے ہی تیل کی قیمتوں میں 3 فیصد سے زائد اضافہ دیکھا گیا۔

یہ اضافہ اس کے بعد سامنے آیا جب رواں ہفتے امریکا اور ایران کے درمیان ممکنہ معاہدے کی خبروں پر تیل کی قیمتوں میں مسلسل تین روز کمی دیکھی گئی تھی۔ ان اطلاعات میں کہا گیا تھا کہ دونوں ممالک جنگ بندی اور آبنائے ہرمز کی مکمل بحالی کے قریب پہنچ چکے ہیں، تاہم ایران کے جوہری پروگرام سے متعلق بڑے تنازعات مؤخر کر دیے گئے تھے۔

ایران نے امریکا پر ایک ماہ پرانی جنگ بندی کی خلاف ورزی کا الزام عائد کیا، جبکہ امریکا نے کہا کہ اس کی کارروائی ایران کی جانب سے آبنائے ہرمز سے گزرنے والے امریکی بحری جہازوں پر حملوں کے ردعمل میں کی گئی۔

ایرانی فوج کے مطابق امریکی حملوں میں ایک ایرانی آئل ٹینکر، ایک اور جہاز اور کچھ شہری علاقے نشانہ بنے۔ اس کے باوجود امریکی صدر ڈونلڈ ٹرمپ نے کہا کہ جنگ بندی اب بھی برقرار ہے۔

ادھر امریکی کموڈیٹی فیوچر ٹریڈنگ کمیشن نے ایران جنگ سے متعلق اہم اعلانات سے قبل 7 ارب ڈالر مالیت کے تیل سودوں کی تحقیقات شروع کر دی ہیں۔ رپورٹس کے مطابق زیادہ تر سودے قیمتوں میں کمی کی شرط پر کیے گئے تھے، جن سے جنگ بندی کے اعلانات کے بعد فائدہ اٹھایا گیا۔