سی این این کے بانی اور میڈیا کے علمبردار ٹِیڈ ٹرنر 87 برس کی عمر میں انتقال کر گئے

امریکی میڈیا کے رنگین اور متحرک شخصیت کے حامل صنعت کار ٹِیڈ ٹرنر، جنہوں نے 1980 میں کیبل نیوز نیٹ ورک (سی این این) کی بنیاد رکھ کر ٹیلی وژن نیوز کے منظرنامے کو یکسر بدل دیا، 87 برس کی عمر میں انتقال کر گئے۔ نیٹ ورک نے بدھ کے روز ان کے انتقال کی تصدیق کی ہے۔

مونچھوں والے جنوبی امریکی تاجر، یاٹنگ (کشتی رانی) کے شوقین اور مخیر شخصیت، جن کی کاروباری سلطنت میں کھیلوں کے کلب بھی شامل تھے، وہ اعصابی بیماری لیوی باڈی ڈیمینشیا میں مبتلا تھے۔

کیبل نیوز نیٹ ورک (سی این این) نے 24 گھنٹے جاری رہنے والی بریکنگ نیوز کے تصور کے ذریعے روایتی نشریاتی صحافت کو بدل کر رکھ دیا اور 1990-91 کی خلیجی جنگ کی کوریج کے بعد عالمی سطح پر غیر معمولی شہرت حاصل کی۔ یہ امریکہ کا پہلا ایسا نیوز چینل تھا جس نے مسلسل خبریں نشر کرنے کا آغاز کیا اور جلد ہی عالمی میڈیا نیٹ ورک بن گیا۔

سی این این کے نامہ نگاروں نے سوویت یونین کے خاتمے سے لے کر چین کے تیانانمن اسکوائر احتجاجی مظاہروں تک دنیا کے بڑے واقعات کی براہِ راست کوریج فراہم کی۔ عراق پر امریکی بمباری کے دوران بغداد میں رپورٹرز کی موجودگی نے اس چینل کو بریکنگ نیوز کے لیے ایک ناگزیر ذریعہ کے طور پر مستحکم کیا۔

سی این این کے عالمی چیئرمین اور سی ای او مارک تھامسن نے کہا کہ ” ٹِیڈ وہ دیو ہیں جن کے کندھوں پر ہم کھڑے ہیں، اور آج ہم سب ان کے اثرات کو اپنی زندگیوں اور دنیا پر یاد کریں گے۔ وہ ہمیشہ سی این این کی روح رہے ہیں۔“

نومبر 1938 میں امریکی ریاست اوہائیو کے شہر سنسناٹی میں پیدا ہونے والے رابرٹ ایڈورڈ ”ٹِیڈ“ ٹرنر نے ٹینیسی کے ایک فوجی بورڈنگ اسکول میں تعلیم حاصل کی، بعد ازاں براؤن یونیورسٹی میں داخلہ لیا مگر ڈگری مکمل کرنے سے قبل نکال دیے گئے۔

اپنے والد کی مالی مشکلات کے بعد خودکشی کے نتیجے میں انہوں نے خاندانی اشتہاری کاروبار سنبھالا۔ بعد ازاں ریڈیو اسٹیشنز خرید کر میڈیا میں قدم رکھا، اور 1970 میں اٹلانٹا کا ایک مشکلات کا شکار ٹی وی اسٹیشن خریدنا ان کا ٹیلی وژن انڈسٹری میں پہلا بڑا قدم تھا۔

دس سال کے اندر یہی ادارہ ان کے قومی سطح کے ٹرنر براڈکاسٹنگ سسٹم کی بنیاد بنا، جس کے منافع سے انہوں نے سی این این لانچ کیا۔

سی این این کی کامیابی نے دنیا بھر میں 24 گھنٹے نیوز چینلز کے قیام کی راہ ہموار کی، جن میں فاکس نیوز، ایم ایس این بی سی اور دیگر عالمی نیٹ ورکس شامل ہیں۔

ٹرنر کا میڈیا ایمپائر سی این این تک محدود نہیں رہا، بلکہ اس میں ٹی بی ایس، ٹی این ٹی، ٹرنر کلاسک موویز اور کارٹون نیٹ ورک جیسے بڑے چینلز بھی شامل تھے۔