نیٹو کا امریکا کے جرمنی میں فوجی کمی کے فیصلے کا جائزہ، وضاحت کے لیے رابطے جاری

نیٹو نے ہفتے کے روز کہا ہے کہ وہ امریکہ کے ساتھ مل کر اس فیصلے کو سمجھنے اور اس کے اثرات کا جائزہ لینے کے لیے باہمی مشاورت میں مصروف ہے، جس کے تحت واشنگٹن نے جرمنی میں اپنے فوجیوں کی تعداد میں 5 ہزار کی کمی کا اعلان کیا ہے۔ یہ پیش رفت دونوں ممالک کے رہنماؤں کے درمیان حالیہ کشیدگی کے بعد سامنے آئی ہے۔

یہ امریکی اقدام اس وقت سامنے آیا جب صدر ڈونلڈ ٹرمپ نے جرمن چانسلر فریڈرک مرز پر ایک بار پھر تنقید کی۔ مرز نے پیر کے روز کہا تھا کہ ایران مشرقِ وسطیٰ میں جنگ کے خاتمے کے لیے جاری مذاکرات میں واشنگٹن کو ”ہومیلیئیٹنگ“ (ذلت آمیز صورتحال) کا سامنا کروا رہا ہے۔

نیٹو کی ترجمان ایلیسن ہارٹ نے سوشل میڈیا پلیٹ فارم ایکس پر کہا ہے کہ ”ہم امریکہ کے ساتھ مل کر جرمنی میں فوجی تعیناتی سے متعلق اس کے فیصلے کی تفصیلات کو سمجھنے کی کوشش کر رہے ہیں۔“

انہوں نے مزید کہا کہ یہ تبدیلی اس بات کو واضح کرتی ہے کہ یورپ کو اپنے دفاعی شعبے میں مزید سرمایہ کاری جاری رکھنی چاہیے اور مشترکہ سلامتی کی ذمہ داری میں زیادہ حصہ لینا ہوگا۔ ان کے مطابق اس سمت میں پہلے ہی پیش رفت ہو رہی ہے، خاص طور پر اس کے بعد جب اتحادی ممالک نے مجموعی قومی پیداوار (جی ڈی پی) کا 5 فیصد دفاع پر خرچ کرنے پر اتفاق کیا تھا۔

ان کا مزید کہنا تھا کہ ”ہمیں اپنی دفاعی صلاحیت اور ڈیٹرنس فراہم کرنے کی اہلیت پر مکمل اعتماد ہے، کیونکہ ایک مضبوط یورپ اور مضبوط نیٹو کی جانب یہ پیش رفت بدستور جاری ہے۔“