پاک بحریہ کی پہلی ہنگور کلاس آبدوز بیڑے میں شامل، چین میں باقاعدہ کمیشننگ

پاکستان نیوی کے میڈیا ونگ (آئی ایس پی آر) کے مطابق پاک بحریہ نے جمعرات کو اپنی پہلی ہنگور کلاس آبدوز پی این ایس/ایم ہنگور کو بیڑے میں شامل (کمیشن) کرلیا ہے۔ اس حوالے سے ایک پروقار تقریب چین کے شہر سانیا میں منعقد ہوئی۔

انٹر سروسز پبلک ریلیشنز (آئی ایس پی آر) کے مطابق صدرِ مملکت آصف علی زرداری نے تقریب میں بطور مہمانِ خصوصی شرکت کی جبکہ چیف آف نیول اسٹاف ایڈمرل نوید اشرف اور پاک بحریہ اور چین کی پیپلز لبریشن آرمی نیوی کے اعلیٰ حکام بھی وہاں موجود تھے۔

تقریب سے خطاب کرتے ہوئے صدرمملکت نے ہنگور کلاس آبدوز کی شمولیت کو پاک بحریہ کی جدید کاری میں ایک تاریخی سنگ میل قرار دیا اور ایک مضبوط، متوازن اور قابلِ اعتماد دفاعی پوزیشن برقرار رکھنے کے پاکستان کے عزم کا اعادہ کیا۔

انہوں نے کہا کہ پاکستان اپنی خود مختاری کا دفاع کرنے، اپنے بحری مفادات کے تحفظ اور اپنی معاشی شہ رگ کی سیکیورٹی کو یقینی بنانے کی بھرپور صلاحیت رکھتا ہے۔

نیول چیف نے کلیدی بحری گزرگاہوں پر عالمی تجارت اور توانائی کی حفاظت کو لاحق بڑھتے ہوئے خطرات کو اجاگر کیا اور جدید ترین بحری صلاحیتوں کی ضرورت پر زور دیا۔

انہوں نے مزید کہا کہ ایک مستحکم اور قواعد پر مبنی بحری نظم و ضبط کو برقرار رکھنے کے لیے جدید ترین ٹیکنالوجی سے لیس بحری افواج ناگزیر ہیں۔

انہوں نے کہا کہ جدید ہتھیاروں، سینسرز اور ایئر انڈیپینڈنٹ پروپلشن سے لیس یہ ہنگور کلاس آبدوزیں خطے میں بحری نظم و ضبط اور استحکام برقرار رکھنے میں کلیدی کردار ادا کریں گی۔

انہوں نے مزید کہا کہ یہ آبدوزیں دشمن کو جارحیت سے باز رکھنے اور بحیرہ عرب سمیت بحر ہند کے وسیع خطے میں رابطے کی اہم بحری گزرگاہوں کی حفاظت کو یقینی بنانے میں اہم ترین کردار ادا کریں گی۔