اسرائیل کی بفر زون سے آگے لبنان کے مزید 7 قصبوں کو خالی کرنے کی وارننگ

اسرائیلی فوج نے جنوبی لبنان میں انخلا کے نئے احکامات جاری کرتے ہوئے رہائشیوں کو ان سات قصبوں سے نکل جانے کا حکم دیا ہے جو بفر زون سے باہر واقع ہیں۔

اسرائیلی ترجمان کے مطابق یہ کارروائی حزب اللہ کی جانب سے جنگ بندی کی مبینہ خلاف ورزیوں کے جواب میں کی جا رہی ہے۔ یہ قصبے دریائے لیطانی کے شمال میں واقع ہیں، جہاں اسرائیلی افواج جنگ بندی کے باوجود اپنی سرگرمیاں جاری رکھے ہوئے ہیں۔

دوسری جانب اسرائیلی وزیراعظم بنجمن نیتن یاہو نے کابینہ اجلاس میں واضح کیا کہ ان کی اولین ترجیح اسرائیل اور اس کے فوجیوں کی سلامتی ہے اور وہ طے شدہ قواعد کے تحت کارروائیاں جاری رکھیں گے۔ ادھر حزب اللہ نے بھی لبنان کے اندر اسرائیلی فوجیوں اور ریسکیو ٹیموں پر حملوں کا دعویٰ کیا ہے۔ امریکہ کی ثالثی میں ہونے والی یہ جنگ بندی مئی کے وسط تک بڑھائی گئی ہے لیکن دونوں جانب سے جاری فائرنگ نے اس کی افادیت پر سوالیہ نشان لگا دیے ہیں۔ یاد رہے کہ 2 مارچ سے جاری اس حالیہ جنگ میں اب تک 2,500 افراد جان سے جاچکے ہیں۔