روسی حملے، یوکرین کے مختلف علاقوں میں 10 افراد ہلاک

روسی افواج نے ہفتے کے روز جنوب مشرقی یوکرینی شہر دنیپرو پر ڈرونز اور میزائلوں کے ذریعے شدید حملے کیے، جن میں دیگر علاقوں کو بھی نشانہ بنایا گیا۔ ان حملوں میں کم از کم 10 افراد ہلاک اور درجنوں زخمی ہوئے۔

صوبائی گورنر اولیکساندر ہانزا کے مطابق شہر میں ہونے والے مختلف حملوں میں آٹھ افراد ہلاک اور 49 زخمی ہوئے۔ رات کے ابتدائی حملے میں ایک رہائشی عمارت کا بڑا حصہ تباہ ہو گیا جس کے ملبے سے چار لاشیں نکالی گئیں۔

بعد ازاں دن کے وقت جب ریسکیو ٹیمیں کارروائی میں مصروف تھیں تو دوسرا حملہ کیا گیا جس میں ایک شخص ہلاک اور سات زخمی ہوئے۔ شام کے وقت مزید حملوں میں آٹھ افراد زخمی ہوئے۔

گورنر نے کہا کہ 20 گھنٹوں سے زائد عرصے تک شہر پر مسلسل ڈرون اور میزائل حملے کیے جاتے رہے، جن کا ہدف رہائشی علاقے تھے۔ یوکرین کی فضائیہ کے مطابق روس نے 619 ڈرونز اور 47 میزائل فائر کیے جن میں سے بڑی تعداد کو مار گرایا گیا۔

یوکرینی حکام نے روس پر شہری اور توانائی تنصیبات کو جان بوجھ کر نشانہ بنانے کا الزام عائد کیا ہے۔ صدر ولودیمیر زیلنسکی نے عالمی برادری سے فضائی دفاعی نظام مزید مضبوط کرنے کا مطالبہ کیا ہے۔