ابھیشیک شرما کی جارحانہ بیٹنگ، حیدرآباد نے دہلی کیپٹلز کو دھول چٹا دی

انڈین پریمیئر لیگ (آئی پی ایل) میں منگل کو سن رائزرز حیدرآباد کے بلے باز ابھیشیک شرما چھائے رہے، جنہوں نے دہلی کیپٹلز کے خلاف دھواں دھار سنچری جڑ کر اپنی ٹیم کو 47 رنز سے فتح دلوا دی۔

25 سالہ ابھیشیک شرما نے محض 68 گیندوں پر 10 چوکوں اور 10 چھکوں کی مدد سے 135 رنز کی ناقابلِ شکست اننگز کھیلی۔ یہ ٹورنامنٹ کی تاریخ کا پانچواں بڑا انفرادی اسکور ہے، جس کی بدولت حیدرآباد نے مقررہ 20 اوورز میں 2 وکٹوں پر 242 رنز کا ہمالیہ جیسا مجموعہ کھڑا کیا۔ جواب میں دہلی کی ٹیم 9 وکٹوں پر 195 رنز ہی بنا سکی۔

میچ کے بعد گفتگو کرتے ہوئے ابھیشیک شرما نے کہا جس طرح ہم نے آغاز کیا، ہمارا ایک منصوبہ تھا لیکن وکٹ تھوڑی سست تھی۔ میرے ذہن میں یہ بات تھی کہ 20 اوورز مکمل ہونے سے پہلے آپ کسی ہدف کو یقینی نہیں کہہ سکتے، میں بس شائقین کو محظوظ کرنا چاہتا تھا۔

گزشتہ دو سیزن سے آسٹریلوی اوپنر ٹریوس ہیڈ کے ساتھ بہترین شراکت داری کرنے والے ابھیشیک نے کہا کہ ٹیم انتظامیہ نے انہیں کھل کر کھیلنے کا اعتماد دیا ہے۔ انہوں نے مزید کہا کہ میں ہمیشہ سے پاور پلے میں اپنی صلاحیتیں دکھانا چاہتا تھا لیکن اس کے لیے کپتان اور کوچ کی حمایت ضروری ہوتی ہے۔ 2024 سے ٹیم کا جو ماحول بنا ہے وہ ہمارے لیے گیم چینجر ثابت ہوا ہے۔

حیدرآباد کی ٹیم اس وقت پوائنٹس ٹیبل پر تیسرے نمبر پر ہے اور ہفتے کو اس کا مقابلہ راجستھان رائلز سے ہوگا۔