ورون چکرورتی کی فارم میں واپسی، کولکتہ نائٹ رائیڈرز کی مسلسل ناکامیوں کا جمود ٹوٹ گیا

ورون چکرورتی کی فارم میں واپسی نے کولکتہ نائٹ رائیڈرز کی جیت کی راہ ہموار کر دی لیکن ان کے بقول بیٹنگ کے لیے موزوں پچز پر اسپنرز کے لیے خاطر خواہ کارکردگی دکھانا اب ایک کڑا چیلنج ہے۔

رواں سال بھارت کی ٹی 20 ورلڈ کپ جیت میں اہم کردار ادا کرنے والے چکرورتی سے کولکتہ کو چوتھے ٹائٹل کے لیے بڑی امیدیں تھیں۔ تاہم انہوں نے ٹورنامنٹ کا آغاز مسلسل تین میچوں میں کوئی وکٹ لیے بغیر کیا تھا۔ اتوار کو راجستھان رائلز کے خلاف انہوں نے 14 رنز دے کر 3 وکٹیں حاصل کیں اور ٹیم کو سات میچوں بعد پہلی فتح دلوائی۔

چکرورتی نے کہا کہ اگر پچ میں کچھ نہ ہو تو بہترین باؤلرز بھی بے بس ہو جاتے ہیں۔انہوں نے بتایا کہ طویل عرصے بعد ملنے والی اس جیت پر ڈگ آؤٹ میں کھلاڑیوں کی آنکھوں میں آنسو تھے۔ کولکتہ اس وقت پوائنٹس ٹیبل پر نویں نمبر پر ہے۔