انڈونیشیا کے صدر تیل پر بات چیت کیلئے روس جائینگے

انڈونیشیا کے صدر پرابوو سبیانتو اتوار کے روز روس کے دورے پر روانہ ہوں گے جہاں وہ روسی صدر ولادیمیر پوتن سے تیل اور توانائی کے معاملات پر بات چیت کریں گے۔

جکارتہ میں صدارتی دفتر نے خبر رساں ادارے اے ایف پی کو تصدیق کی کہ صدر پرابوو اتوار کی شام روس کے لیے روانہ ہوں گے۔

انڈونیشیا کے وزیر خارجہ سوگیونو کے مطابق تیل، جسے انہوں نے انڈونیشیا کے لیے اسٹریٹجک اہمیت کا حامل قرار دیا، مذاکرات کے ایجنڈے میں شامل ہوگا۔ انہوں نے کہا کہ ملاقات میں عالمی جغرافیائی سیاست اور توانائی کی صورتحال پر بھی تبادلہ خیال کیا جائے گا۔

صدر پرابوو نے حالیہ وقت میں جنوبی کوریا اور جاپان کا بھی سفر کیا تھا اور اپنے غیر ملکی دوروں کا دفاع کرتے ہوئے کہا تھا کہ تیل کی فراہمی کو یقینی بنانے کے لیے انہیں مختلف ممالک جانا پڑتا ہے۔

انڈونیشیا، جہاں ایندھن پر بھاری سبسڈی دی جاتی ہے، تیل پیدا کرنے والا ملک ہونے کے باوجود نیٹ امپورٹر ہے۔ عالمی سطح پر تیل کی قیمتوں میں اضافے کے باعث ملک کو دباؤ کا سامنا ہے۔

گزشتہ ماہ حکومت نے ایندھن کی راشننگ اور سرکاری ملازمین کے لیے ہفتے میں ایک دن گھر سے کام کی پالیسی بھی متعارف کرائی تھی تاکہ توانائی کی بچت کی جا سکے۔

روس کے سفیر نے کہا ہے کہ ان کا ملک انڈونیشیا کو تیل فروخت کرنے کے لیے تیار ہے۔