پہلی میڈ ان گوجرانوالہ ایکسپو کا آج سے آغاز، 100 سے زائد کمپنیاں مقامی مصنوعات پیش کرینگی

صنعتی شہر گجرانوالہ کے ہنر مندوں کی تیار کردہ مصنوعات کی پہلی بار کراچی میں نمائش کا انعقاد کیا جا رہا ہے جس کا مقصد مقامی صنعت کو فروغ دینا اور کاروباری روابط کو وسعت دینا ہے۔

تین روزہ میڈ اِن پاکستان گجرانوالہ نمائش کا آغازآج سے کراچی ایکسپو سینٹر میں ہوگا، جس میں مختلف صنعتی شعبوں سے تعلق رکھنے والی کمپنیوں اور کاریگروں کی تیار کردہ مصنوعات پیش کی جائیں گی۔

نمائش کا انعقاد ٹریڈ ڈویلپمنٹ اتھارٹی آف پاکستان اور گجرانوالہ چیمبر آف کامرس اینڈ انڈسٹری کے اشتراک سے کیا جا رہا ہے۔

منتظمین کے مطابق اس ایونٹ کا مقصد گجرانوالہ کی صنعتی صلاحیت کو اجاگر کرنا، ملکی خریداروں اور تاجر برادری کو ایک پلیٹ فارم فراہم کرنا اور میڈ اِن پاکستان مصنوعات کی حوصلہ افزائی کرنا ہےنمائش میں الیکٹریکل آلات، سیرامکس، پلاسٹک فرنیچر، کچن ویئر اور سینیٹری ویئر سمیت متعدد صنعتی مصنوعات رکھی جائیں گی، جو گجرانوالہ کی صنعت کی مہارت اور جدت کی عکاسی کرتی ہیں۔

کاروباری حلقوں کے مطابق گجرانوالہ ملک کے اہم صنعتی مراکز میں شمار ہوتا ہے جہاں گھریلو استعمال کی اشیاء سےلےکرانجینئرنگ مصنوعات تک بڑی تعداد میں تیار کی جاتی ہیں۔

ماہرین کا کہنا ہے کہ اس نوعیت کی نمائشیں نہ صرف صنعتی شعبے کی حوصلہ افزائی کرتی ہیں بلکہ مقامی سطح پر کاروباری سرگرمیوں کو فروغ دینے اور برآمدات بڑھانے میں بھی معاون ثابت ہوتی ہیں ان کے مطابق کراچی جیسے بڑےتجارتی مرکز میں گجرانوالہ کی مصنوعات کی نمائش سےنئی کاروباری شراکت داریوں کے امکانات پیدا ہوں گے اور ملکی صنعت کو وسعت ملے گی۔

کاپی رائٹ بزنس ریکارڈر 2026