وزیر اعظم شہباز شریف کا ایندھن کی قیمتوں میں کمی کے لیے ملک بھر میں الیکٹرک گاڑیوں کی طرف منتقلی پر زور

وزیرِ اعظم شہباز شریف نے پیر کے روز ملک بھر میں ماحول دوست الیکٹرک گاڑیوں ( ای ویز) کے فروغ کی ضرورت پر زور دیا اور کہا کہ یہ تبدیلی عالمی سطح پر بڑھتی ہوئی تیل کی قیمتوں کے درمیان ملکی زرِ مبادلہ کے ذخائر بچانے میں مددگار ثابت ہو سکتی ہے۔ یہ بات سرکاری خبر رساں ایجنسی اے پی پی نے ایک رپورٹ میں کہی ہے۔

اسلام آباد کیپٹل ٹریفک پولیس کو ایکو اسمارٹ ای وی فراہم کرنے کی تقریب سے خطاب میں وزیرِ اعظم نے کہا کہ اس طرح کے توانائی بچت کے اقدامات کو تمام قانون نافذ کرنے والے اداروں اور صوبوں کو اپنانا چاہیے۔

وزیرِ اعظم نے بتایا کہ وزارت داخلہ کی جانب سے مجموعی طور پر 15 الیکٹرک گاڑیاں فراہم کی گئی ہیں، جو پیٹرول یا ڈیزل کے بغیر بیٹریوں پر چلتی ہیں، اور گاڑیوں کی ایک اور کھیپ جلد شامل کی جائے گی۔

اس اقدام کو اہم قرار دیتے ہوئے وزیراعظم نے کہا کہ یہ اقدامات ملک کی غیر ملکی زرِ مبادلہ کے ذخائر پر مثبت اثر ڈالیں گے۔

اے پی پی کے مطابق ایکو اسمارٹ الیکٹرک گاڑیوں کی فراہمی حکومت کی توانائی بچت کی پالیسی کا حصہ ہے۔

فیول اکانومی اور الیکٹرک گاڑیوں کی پالیسی پر کام موجودہ علاقائی بحرانوں سے پہلے شروع ہو چکا تھا، جس کے نتیجے میں گاڑیوں کی خریداری کا عمل بھی شروع ہو گیا تھا۔