غیر یقینی صورتحال، امریکی ڈالر میں محدود اتار چڑھاؤ

عالمی کرنسی مارکیٹ میں منگل کے روز امریکی ڈالر میں محدود اتار چڑھاؤ دیکھا گیا کیونکہ سرمایہ کار ایران جنگ سے متعلق پیش رفت کا جائزہ لے رہے ہیں۔ اسی دوران آسٹریلوی ڈالر میں معمولی کمی ریکارڈ کی گئی جبکہ مارکیٹ کو توقع ہے کہ آسٹریلیا کا مرکزی بینک آج شرح سود میں اضافہ کر سکتا ہے۔

ایشیا میں ٹریڈنگ کے دوران یورو 0.12 فیصد کمی کے ساتھ 1.1492 ڈالر پر آ گیا جبکہ برطانوی پاؤنڈ بھی 0.1 فیصد کمی کے بعد 1.33 ڈالر پر آ گیا۔ دونوں کرنسیاں گزشتہ سیشن میں ہونے والے نمایاں اضافے کے بعد کچھ پیچھے ہٹ گئیں۔ دوسری جانب ڈالر انڈیکس تقریباً مستحکم رہا اور 99.913 کی سطح پر برقرار رہا۔

مارکیٹ میں بے چینی اس وقت دوبارہ بڑھ گئی جب امریکہ کے کئی اتحادیوں نے صدر ڈونلڈ ٹرمپ کی اس درخواست کو مسترد کر دیا جس میں انہوں نے آبنائے ہرمز سے گزرنے والے تیل بردار جہازوں کی حفاظت کے لیے جنگی بحری جہاز بھیجنے کا مطالبہ کیا تھا۔ اس پیش رفت نے توانائی کی برآمدات جلد معمول پر آنے کی امیدوں کو مزید کمزور کر دیا۔

امریکہ اور اسرائیل کی ایران کے خلاف جنگ کے باعث تیل کی قیمتوں میں تیزی سے اضافہ ہوا ہے جس سے سرمایہ کاروں کو مہنگائی کے بڑھنے کا خدشہ لاحق ہو گیا ہے۔ اسی خدشے کے باعث عالمی سطح پر شرح سود سے متعلق توقعات میں بھی نمایاں تبدیلی آئی ہے جس سے امریکی ڈالر کو دیگر کرنسیوں کے مقابلے میں تقویت ملی ہے۔

اب سرمایہ کاروں کی توجہ آسٹریلیا کے مرکزی بینک کے اجلاس پر مرکوز ہے جہاں مارکیٹ کے اندازوں کے مطابق شرح سود میں 25 بیسس پوائنٹس اضافے کا تقریباً 78 فیصد امکان ہے۔ اس خبر کے بعد آسٹریلوی ڈالر 0.16 فیصد کمی کے ساتھ 0.706 ڈالر پر آ گیا جبکہ نیوزی لینڈ ڈالر 0.24 فیصد کمی کے بعد 0.5848 ڈالر پر ٹریڈ کرتا رہا۔

ادھر جاپانی ین بھی کمزور ہو کر 159.35 فی ڈالر تک پہنچ گیا جو اہم 160 کی سطح کے قریب ہے، حالانکہ جاپانی حکام نے زبانی طور پر مداخلت کی وارننگ بھی دی ہے۔ تجزیہ کاروں کے مطابق تیل کی بڑھتی قیمتیں جاپان کے تجارتی توازن اور مہنگائی پر دباؤ ڈال سکتی ہیں کیونکہ ملک توانائی کی درآمدات پر بہت زیادہ انحصار کرتا ہے۔