سول اسپتال کراچی کی جدید خطوط پر تعمیر نو، 50 ارب روپے کا ابتدائی ماسٹر پلان منظور

سندھ حکومت نے سول اسپتال کراچی کو جدید ترین طبی مرکز میں تبدیل کرنے کے لیے 50 ارب روپے کے ابتدائی ماسٹر پلان کی منظوری دے دی ہے، جس کے تحت طویل مدتی وژن کے طور پر 100 ارب روپے تک کی سرمایہ کاری کی جائے گی۔

وزیراعلیٰ سندھ سید مراد علی شاہ نے پیر کو اعلیٰ سطح کے اجلاس کی صدارت کرتے ہوئے اس وسیع تر منصوبے کو حتمی شکل دی، جس کا مقصد اسپتال کو عالمی معیار کی سہولیات سے آراستہ کرنا ہے۔

اجلاس میں صوبائی وزراء، اعلیٰ حکام اور فیصل ایدھی سمیت نجی شعبے کی معروف شخصیات نے شرکت کی۔ اس بڑے ترقیاتی منصوبے کے تحت اسپتال کا کل رقبہ دوگنا کر دیا جائے گا اور موجودہ 2,142 بستروں کی گنجائش میں مزید 500 بستروں کا اضافہ ہوگا۔ پرانی اور مخدوش عمارتوں کی جگہ جدید میڈیکل اور سرجیکل ٹاورز تعمیر کیے جائیں گے، جن میں عبدالستار ایدھی میڈیکل ٹاور کی تعمیر کا کام فوری طور پر شروع کیا جائے گا۔

ماسٹر پلان میں نیا او پی ڈی بلاک، جدید برنز وارڈ، ایک مخصوص جیل وارڈ، جدید ترین مردہ خانہ اور کچرا ٹھکانے لگانے کا جدید نظام بھی شامل ہے۔ اس کے علاوہ ڈاکٹروں اور نرسوں کے لیے ہاسٹلز اور نئے انتظامی بلاکس بھی بنائے جائیں گے۔

وزیراعلیٰ نے ہدایت دی ہے کہ تعمیراتی کام کے دوران اسپتال کی تاریخی عمارتوں کے ورثے کو محفوظ رکھا جائے اور ایمبولینسوں کی آمد و رفت آسان بنانے کے لیے اطراف کی سڑکوں کو کشادہ کیا جائے۔ منصوبے کی نگرانی کے لیے سرکاری و نجی ماہرین پر مشتمل بورڈ کا پہلا اجلاس عید الفطر کے بعد منعقد ہوگا، تاکہ باقاعدہ کام کا آغاز کیا جا سکے۔