وزیراعظم کا دبئی میں میزائل کے ملبے سے پاکستانی شہریوں کی اموات پررنج وغم کا اظہار

وزیراعظم شہباز شریف نے دبئی میں میزائل روکنے کے عمل کے دوران ملبہ گاڑی پر گرنے سے دو پاکستانی شہریوں کی ہلاکت پر گہرے دکھ کا اظہار کیا ہے۔

وزیراعظم نے سوشل میڈیا پلیٹ فارم ایکس پر جاری بیان میں کہا کہ دبئی میں میزائل کے ملبے کی وجہ سے دو پاکستانی شہریوں کی المناک موت پر مجھے شدید دکھ ہوا ہے۔

متحدہ عرب امارات کے حکام کے مطابق یہ واقعہ دبئی کے علاقے البرشا میں اس وقت پیش آیا جب فضائی دفاعی کارروائی کے نتیجے میں گرنے والے ملبے کی زد میں ایک گاڑی آ گئی، جس سے موقع پر موجود پاکستانی ڈرائیور جاں بحق ہو گیا۔

دبئی میڈیا آفس کا کہنا ہے کہ خطے میں بڑھتی ہوئی کشیدگی کے درمیان فضائی دفاعی کارروائی کے نتیجے میں گرنے والے ٹکڑے گاڑی کو لگے۔

یہ پیش رفت ایک ایسے وقت میں سامنے آئی ہے جب حالیہ دنوں میں مشرقِ وسطیٰ میں دشمنی اور کشیدگی میں اضافہ ہوا ہے، جہاں میزائلوں اور ڈرونز کے تبادلے کے باعث خلیجی خطے کے مختلف حصوں میں فضائی دفاعی نظام کو فعال کرنا پڑا ہے۔

وزیراعظم شہباز شریف نے کہا کہ متحدہ عرب امارات میں پاکستان کے سفارتی مشن دبئی کے حکام کے ساتھ قریبی رابطے میں ہیں، تاکہ تمام ضروری امداد فراہم کی جا سکے اور میتوں کی وطن واپسی کے عمل کو آسان بنایا جا سکے۔

وزیراعظم نے مزید کہا کہ غم کی اس گھڑی میں ہماری ہمدردیاں سوگوار خاندان کے ساتھ ہیں۔

واضح رہے کہ متحدہ عرب امارات میں پاکستانیوں کی ایک بڑی تعداد آباد ہے، جہاں لاکھوں پاکستانی ملک بھر میں مقیم اور برسرِ روزگار ہیں۔