عالمی مارکیٹ میں سونے کی قیمت میں 1 فیصد اضافہ

سونے کی قیمتوں میں جمعہ کو اضافہ ہوا اور پچھلے سیشن میں ایک فیصد سے زائد کمی کے بعد دوبارہ اوپر آئی، کیونکہ سرمایہ کار مشرق وسطیٰ میں بڑھتے ہوئے تنازعے کے دوران محفوظ اثاثے کے طور پر سونا خریدنے لگے۔

اس وقت اسپوٹ گولڈ 5,124.73 ڈالر فی اونس پر ٹریڈ کر رہا تھا۔ اس ہفتے اب تک سونے کی قیمت میں تقریباً تین فیصد کمی ہوئی ہے، جس سے چار ہفتوں کی مسلسل منافع بخش لہر ختم ہونے کا امکان ہے، کیونکہ شرح سود میں کمی کے امکانات کم ہونے اور توانائی کی بڑھتی ہوئی قیمتوں نے افراط زر کے خدشات بڑھا دیے ہیں۔ امریکی گولڈ فیوچرز اپریل ڈیلیوری کے لیے 1.1 فیصد اضافے کے ساتھ 5,131 ڈالر پر پہنچ گئے۔

ڈالر میں کمی کے باعث دیگر کرنسی رکھنے والوں کے لیے سونے کی قیمت نسبتا کم ہو گئی۔او این ڈی اے کے سینئر مارکیٹ تجزیہ کار کیلون وونگ کے مطابق جغرافیائی سیاسی خطرات کم نہیں ہوئے اور ایرانی وزیر خارجہ کے حالیہ بیان کے بعد زمین پر حملے کے خطرات موجود ہیں، جس سے سونے کی قیمت کی حمایت ہو رہی ہے۔

جنگ کے چھٹے دن ایران نے اسرائیل، متحدہ عرب امارات اور قطر پر حملے کیے۔ امریکی وزیر دفاع پیٹ ہیگسیٹ اور ایڈمرل بریڈ کوپر نے کہا کہ امریکہ کے پاس بمباری جاری رکھنے کے لیے کافی گولہ بارود موجود ہے۔ امریکی اور اسرائیلی فوجی کارروائی نے ایران کے مختلف اہداف کو نشانہ بنایا اور ایرانی جوابی کارروائی شروع ہوئی۔

عالمی توانائی کی قیمتیں بھی بڑھ گئیں کیونکہ جنگ کی وجہ سے سپلائی اور شپنگ متاثر ہوئی، جس سے کچھ بڑے مشرق وسطیٰ کے تیل پیدا کرنے والے ممالک نے پیداوار کم کی۔

سونا، جو روایتی طور پر محفوظ اثاثے کے طور پر دیکھا جاتا ہے، اس سال اب تک تقریباً 18 فیصد بڑھ چکا ہے اور ریکارڈ ہائی پر ہے۔ وونگ نے کہا کہ سونے کی قیمت قلیل مدتی طور پر متغیر رہ سکتی ہے، اہم سپورٹ 5,040 ڈالر اور مزاحمتی سطح 5,280 ڈالر ہے، اور اگر مزاحمتی سطح ٹوٹ گئی تو قیمت 5,448 ڈالر تک جا سکتی ہے۔

اس دوران اسپوٹ سلور 1.7 فیصد اضافے کے ساتھ 83.57، ڈالر اسپوٹ پلاٹینم تقریباً 1 فیصد اضافے کے ساتھ 2,141.55 ڈالر اور پیلاڈیئم 1.2 فیصد اضافے کے ساتھ 1,648.65 ڈالر پر ٹریڈ کر رہا تھا۔