باپ بننے کی خوشی اور ورلڈ کپ فائنل کا ٹکٹ : میٹ ہنری کا پانچ روزہ سحر انگیز سفر

نیوزی لینڈ کے فاسٹ باؤلر میٹ ہنری نے محض پانچ دنوں میں باپ بننے کی خوشی اور اپنی ٹیم کو ٹی 20 ورلڈ کپ کے فائنل میں پہنچانے کا ایک یادگار سفر مکمل کیا۔ کولکتہ میں جنوبی افریقہ کے خلاف کھیلے گئے پہلے سیمی فائنل میں ہنری نے 34 رنز دے کر 2 اہم وکٹیں حاصل کیں، جس کی بدولت نیوزی لینڈ نے نو وکٹوں سے شاندار فتح حاصل کی۔ اس میچ میں فن ایلن کی محض 33 گیندوں پر ریکارڈ ساز تیز ترین سنچری نے کیویز کو اتوار کے روز احمد آباد میں ہونے والے فائنل تک پہنچا دیا ہے۔

میٹ ہنری کی کارکردگی اس لحاظ سے بھی غیر معمولی تھی کہ وہ اپنے دوسرے بچے کی پیدائش کے لیے گھر روانہ ہوئے تھے اور سیمی فائنل سے محض ایک رات قبل ہی واپس انڈیا پہنچے۔ 27 فروری کو سپر ایٹ مرحلے کے بعد وطن جانے والے ہنری نے اپنے بیٹے جیک کی پیدائش کے 24 گھنٹے کے اندر ہی دوبارہ میدان سنبھال لیا۔انہوں نے مسکراتے ہوئے بتایا کہ وہ واپسی کے سفر میں اپنی نیند پوری کرتے رہے۔

میٹ ہنری نے خاندان کے ساتھ وقت گزارنے کو اہم قرار دیتے ہوئے سیمی فائنل کے لیے بروقت واپسی پر خوشی کا اظہار کیا۔ نیوزی لینڈ کی ٹیم اب دوسری بار ٹی 20 ورلڈ کپ کے فائنل میں پہنچی ہے، جہاں اس کا مقابلہ بھارت یا انگلینڈ سے ہوگا۔