اسرائیل کا مغربی کنارے سے الحاق، برازیل، فرانس، اسپین، ترکیہ سمیت دیگر ممالک کی مذمت

برازیل، فرانس، اسپین، ترکیہ اور دیگر کئی ممالک کے وزرائے خارجہ نے اسرائیل کے حالیہ فیصلوں کی سخت مذمت کی ہے جن کے تحت مقبوضہ مغربی کنارے پر اسرائیلی غیر قانونی کنٹرول میں غیر معمولی اضافہ کیا جا رہا ہے۔

ترکیہ کے وزارت خارجہ کی جانب سے پیر دیر گئے جاری مشترکہ بیان میں کہا گیا کہ یہ تبدیلیاں وسیع نوعیت کی ہیں، فلسطینی زمین کو اسرائیلی ’ریاستی زمین‘ کے طور پر دوبارہ درجہ بندی کرنا، غیر قانونی آباد کاری کی رفتار کو تیز کرنا اور اسرائیلی انتظامیہ کو مزید مضبوط کرنا شامل ہے۔

بیان پر سعودی عرب، مصر، قطر کے علاوہ عرب لیگ اور اسلامی تعاون تنظیم کے سربراہان نے بھی دستخط کیے۔

اسرائیلی کابینہ نے 15 فروری کو مقبوضہ مغربی کنارے پر کنٹرول مضبوط کرنے اور آبادکاروں کے لیے زمین خریدنا آسان بنانے کے مزید اقدامات کی منظوری دی تھی، جسے فلسطینیوں نے عملی طور پر الحاق قرار دیا۔

مقبوضہ مغربی کنارہ وہ علاقے ہیں جو فلسطینی مستقبل کی آزاد ریاست کے لیے چاہتے ہیں۔ ان میں زیادہ تر اسرائیلی فوجی کنٹرول میں ہے، جبکہ کچھ علاقوں میں محدود فلسطینی خودمختاری مغربی مدد یافتہ فلسطینی اتھارٹی کے زیر انتظام ہے۔

مشترکہ بیان میں کہا گیا کہ یہ آبادیاں اور ان کے فروغ کے لیے کیے جانے والے فیصلے بین الاقوامی قانون کی کھلی خلاف ورزی ہیں اور ناقابل قبول عملی الحاق“ کی طرف ایک قدم ہیں۔

بیان میں مزید کہا گیا کہ یہ اقدامات خطے میں امن و استحکام کے لیے جاری کوششوں کو نقصان پہنچاتے ہیں اور خطے میں کسی بھی معنی خیز انضمام کے امکانات کو خطرے میں ڈال دیتے ہیں۔

عالمی برادری نے زور دیا کہ اسرائیل کو بین الاقوامی قانون اور انسانی حقوق کے معیار کے مطابق اپنی پالیسیوں میں فوری تبدیلی لانی چاہیے تاکہ مشرق وسطی میں دیرپا امن اور استحکام ممکن ہو سکے۔