رمضان 2026 کا آغاز خوشگوار اور اختتام گرم ہوگا، این ڈی ایم اے کی پیش گوئی

نیشنل ڈیزاسٹر مینجمنٹ اتھارٹی ( این ڈی ایم اے) کے نیشنل ایمرجنسیز آپریشن سینٹر ( این ای او سی ) نے ماہ رمضان المبارک کے دوران متوقع موسمی حالات کے حوالے سے پیش گوئی جاری کی ہے۔

این ڈی ایم اے کے مطابق رمضان 2026 کے دوران ملک بھر میں مجموعی طور پر خوشگوار موسم کی توقع ہے، اور دن کے درجہ حرارت میں بتدریج اضافہ متوقع ہے، جبکہ راتیں نسبتاً ٹھنڈی رہیں گی۔

بیان میں کہا گیا ہے کہ رمضان کے پہلے عشرے کے دوران زیادہ تر علاقوں میں موسم خشک رہنے کا امکان ہے، تاہم شمالی اور مغربی علاقوں میں ہلکی بارش متوقع ہے۔ خیبر پختونخوا، گلگت بلتستان اور شمالی بلوچستان میں راتیں سرد رہیں گی۔

دوسرے عشرے میں ڈیزاسٹر مینجمنٹ باڈی نے کہا ہے کہ موسم قدرے گرم ہونے کی امید ہے۔ اس میں کہا گیا ہے کہ شمالی علاقوں، وسطی پنجاب اور پوٹھوہار کے علاقے میں کہیں کہیں آندھی اور گرج چمک کے ساتھ بارش کا امکان ہے۔

تیسرے عشرے کے دوران ملک کے مختلف حصوں میں بارش متوقع ہے، شمالی پاکستان اور وسطی پنجاب میں وقفے وقفے سے بارش کی پیش گوئی کی گئی ہے۔

رمضان المبارک کے اختتام تک جنوبی پنجاب، سندھ اور بلوچستان میں گرمی میں نمایاں اضافہ متوقع ہے۔

این ڈی ایم اے کے نیشنل ایمرجنسی آپریشن سینٹر کی جانب سے عوام اور متعلقہ اداروں کو موسم کی متوقع صورتحال اور ممکنہ خطرات کے بارے میں ممکنہ نقصانات سے بروقت پیشگی اطلاعات فراہم کی جا رہی ہیں۔

دریں اثناء پاکستان کے محکمہ موسمیات (پی ایم ڈی) نے کہا ہے کہ منگل کے روز کراچی کے مختلف علاقوں میں ہلکی سے درمیانی بارش اور ژالہ باری کی اطلاع ملی ہے۔

بارش کے بعد شہر میں موسم خوشگوار ہو گیا ہے۔ گلستان جوہر، نارتھ ناظم آباد، فیڈرل بی ایریا، یونیورسٹی روڈ، اورنگی ٹاؤن، سائٹ ایریا اور بفر زون سمیت کئی علاقوں میں بارش ہوئی۔ اس دوران اسکیم 33 اور اس کے آس پاس کے علاقوں میں بھی بارش کے دوران ژالہ باری ہوئی۔