فیلڈ مارشل عاصم منیر کی امریکی وزیر خارجہ سے علاقائی و عالمی سیکیورٹی پر گفتگو

انٹر سروسز پبلک ریلیشنز(ائی ایس پی آر) نے بتایا ہے کہ چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیرنے 12 سے 14 فروری تک جرمنی کا دورہ کیا جہاں انہوں نے 62ویں میونخ سیکیورٹی کانفرنس کے موقع پر مختلف اہم ملاقاتوں میں شرکت کی۔

آئی ایس پی آر کے مطابق آرمی چیف فیلڈ مارشل عاصم منیر نے کانفرنس کے سائیڈ لائنز پر متعدد عالمی شخصیات سے ملاقاتیں کیں۔

دورے کے دوران انہوں نے امریکی وزیر خارجہ مارکو روبیو سے ملاقات کی جس میں باہمی دلچسپی کے امور، عالمی اور علاقائی سیکیورٹی صورتحال اور انسداد دہشت گردی تعاون پر تبادلہ خیال کیا گیا۔

جرمن حکام سے ملاقاتوں میں فیلڈ مارشل عاصم منیر نے وفاقی وزیر داخلہ الیگزینڈر ڈوبرنڈٹ، جرمن چانسلر کے خارجہ و سیکیورٹی پالیسی مشیر گونٹر زاؤٹر اور جرمن مسلح افواج کے چیف آف ڈیفنس جنرل کارسٹن بریور سے ملاقاتیں کیں۔ ان ملاقاتوں میں سیکیورٹی چیلنجز، دوطرفہ دفاعی تعاون اور عالمی امن کے فروغ کے لیے دوطرفہ و کثیرالجہتی مکالمے کی اہمیت پر گفتگو کی گئی۔

آرمی چیف فیلڈ مارشل عاصم منیر نے برازیل کی مسلح افواج کے جوائنٹ اسٹاف کے سربراہ ایڈمرل ریناٹو روڈریگز دے اگویار فریرے سے بھی تعمیری ملاقات کی، جس میں عسکری تعاون کو مزید وسعت دینے پر بات چیت ہوئی۔ علاوہ ازیں لبنانی مسلح افواج کے کمانڈر جنرل روڈولف ہیکل نے بھی ان سے ملاقات کی۔

ملاقاتوں کے دوران عالمی و علاقائی سیکیورٹی صورتحال اور دفاعی تعاون کو مزید مضبوط بنانے کے اقدامات پر تفصیلی تبادلہ خیال کیا گیا۔