برٹش کولمبیا میں فائرنگ سے ہلاکتیں،کینیڈا کے وزیراعظم نے یورپ کا دورہ معطل کر دیا

کینیڈا کے وزیرِاعظم مارک کارنی نے برٹش کولمبیا کے دور دراز علاقے ٹمبلر رج میں پیش آنے والے مہلک فائرنگ کے واقعے کے بعد میونخ سیکیورٹی کانفرنس کا اپنا مجوزہ دورہ معطل کر دیا ہے۔ وزیرِاعظم کے دفتر کی جانب سے جاری بیان میں کہا گیا ہے کہ المناک واقعے کے پیش نظر وزیرِاعظم فی الحال بیرونِ ملک سفر نہیں کریں گے۔

مارک کارنی نے اس سے قبل اعلان کیا تھا کہ وہ بدھ سے اتوار تک جرمنی کے شہر میونخ میں ہونے والی عالمی سیکیورٹی کانفرنس میں شرکت کریں گے، جہاں عالمی رہنما اہم سلامتی اور خارجہ پالیسی امور پر تبادلہ خیال کرتے ہیں۔ تاہم تازہ پیش رفت کے بعد انہوں نے ملک میں رہنے اور صورتحال کی نگرانی کو ترجیح دینے کا فیصلہ کیا ہے۔

برٹش کولمبیا میں ہونے والے فائرنگ کے اس افسوسناک واقعے میں مجموعی طور پر نو افراد ہلاک ہوئے، جن میں سے سات کو ایک اسکول میں گولیاں مار کر قتل کیا گیا۔ واقعے نے پورے ملک کو ہلا کر رکھ دیا ہے اور مقامی کمیونٹی شدید صدمے میں ہے۔

حکام کے مطابق واقعے کی تحقیقات جاری ہیں جبکہ وفاقی اور صوبائی سطح پر سیکیورٹی اور عوامی تحفظ کے اقدامات کا ازسرِنو جائزہ لیا جا رہا ہے۔ وزیرِاعظم نے متاثرہ خاندانوں سے اظہارِ ہمدردی کرتے ہوئے کہا ہے کہ حکومت اس مشکل وقت میں ان کے ساتھ کھڑی ہے۔