ریجنل کنکٹیوٹی قریبی تعاون کریں گے، شہباز شریف کی ازبک صدر سے گفتگو

وزیراعظم شہباز شریف نے جمعرات کے روز پاکستان اور ازبکستان کے درمیان علاقائی رابطوں کو فروغ دینے کے لیے اپنے عزم کا اعادہ کرتے ہوئے ازبکستان-افغانستان-پاکستان ریل منصوبے کو دونوں ممالک اور وسیع خطے کے لیے ممکنہ طور پر ایک گیم چینجر قرار دیا۔

وزیراعظم شہباز شریف نے دو روزہ سرکاری دورے پر پاکستان آئے ازبک صدر شوکت مرزیایوف کے ساتھ ایک تقریب سے خطاب کیا، جس میں 28 معاہدوں اور مفاہمت کی یادداشتوں کے تبادلےکئےگئے، جن میں 20 کلیدی دستاویزات بھی شامل ہیں، انہوں نے اس موقع پر مکمل تعاون کی یقین دہانی کرائی اور کہا کہ یہ منصوبہ نہ صرف تجارتی راستوں کو آسان بنائے گا بلکہ علاقائی نقل و حرکت کو بہتر کرنے اور سرمایہ کاری و تجارت کے نئے مواقع فراہم کرے گا۔ وزیراعظم نے اس منصوبے کو دوستی، تعاون اور مشترکہ خوشحالی کا پل قرار دیا۔

شہباز شریف نے ازبک صدر کو نیشنل یونیورسٹی آف سائنسز اینڈ ٹیکنالوجی (نسٹ) اسلام آباد کی جانب سے اعزازی پروفیسرشپ اور ڈاکٹریٹ سے نوازنے پر مبارکباد دی اور ان کی خدمات، غیر متزلزل لگن اور خطے میں امن و خوشحالی کے لیے کوششوں کو سراہا۔ اس کے علاوہ، صدر شوکت مرزیایوف کو نشانِ پاکستان سے بھی نوازا گیا تاکہ دوستانہ تعلقات کو مضبوط اقتصادی تعاون اور سرمایہ کاری میں تبدیل کرنے کی ان کی کاوشوں کو تسلیم کیا جا سکے۔

تقریب میں 28 معاہدوں اور مفاہمت کی یادداشتوں پر دستخط ہوئے، جن میں دفاع، ماحولیاتی تبدیلی، آفات کے انتظام، زراعت، پھلوں کی برآمدات، کان کنی اور جیو سائنسز، سزا یافتہ افراد کی منتقلی اور منشیات کے خلاف مشترکہ کوششیں شامل ہیں۔

وزیراعظم نے دونوں ممالک کے تاریخی اور ثقافتی روابط، سلک روٹ کے قدیم تعلقات، مغل دور کی مشترکہ وراثت اور سمرقند و بخارا کے علمی خدمات کو اجاگر کیا۔ انہوں نے پانچ سالہ مشترکہ ایکشن پلان کے تحت انفارمیشن ٹیکنالوجی، زراعت، ٹیکسٹائل اور دیگر شعبوں میں نئے مواقع بروئے کار لانے کی اہمیت پر زور دیا۔

صدر شوکت مرزیایوف نے پاکستانی قیادت کی جانب سے دی گئی گرمجوشی اور مہمان نوازی پر اظہار تشکر کرتے ہوئے دونوں ممالک کے درمیان تعلیم، سائنس اور ٹیکنالوجی میں تعاون کو مضبوط کرنے کی ضرورت پر زور دیا اور تجارتی حجم بڑھانے کے لیے پروٹوکول پر دستخط کیے۔

ان کے استقبال کے موقع پر نور خان ائر بیس پر 21 توپوں کی سلامی، پاکستان مسلح افواج کی سلامی اور ٹرائی سروسز بینڈ کی پرفارمنس بھی شامل تھی۔

کاپی رائٹ بزنس ریکارڈر، 2026