صدر آصف زرداری آج یواے ای کے چار روزہ سرکاری دورے پر روانہ ہوں گے

صدرِ مملکت آصف علی زرداری 26 سے 29 جنوری تک متحدہ عرب امارات (یو اے ای) کا چار روزہ سرکاری دورہ کریں گے۔

دفترِ خارجہ نے ایک بیان میں اس کی تصدیق کرتے ہوئے مزید کہا کہ صدر کے ہمراہ ایک اعلیٰ سطح کا وفد بھی ہوگا۔

دورے کے دوران صدر مملکت متحدہ عرب امارات کی قیادت کے ساتھ اعلیٰ سطح کی ملاقاتیں کریں گے جن میں دوطرفہ تعلقات کے تمام پہلوؤں کا جائزہ لیا جائے گا، بالخصوص تجارت اور اقتصادی شراکت داری، دفاع اور سلامتی، اور عوامی سطح پر روابط کے شعبوں پر توجہ دی جائے گی۔

مذاکرات میں باہمی دلچسپی کے علاقائی اور بین الاقوامی امور پر بھی توجہ مرکوز کی جائے گی۔

وزارتِ خارجہ کا کہنا ہے کہ صدرِ مملکت کا یہ دورہ، متحدہ عرب امارات کے صدر کے حالیہ دورہ پاکستان کے تسلسل میں ہے جو دونوں ممالک کے درمیان گہرے برادرانہ تعلقات کی عکاسی کرتا ہے، یہ دورہ پاکستان اور یو اے ای کی مضبوط دوستی کو ایک ایسی شراکت داری میں بدلنے کے عزم کا اعادہ ہے جو دونوں کے لیے یکساں فائدہ مند ہو۔

پاکستان اور متحدہ عرب امارات نے گزشتہ ہفتے ورلڈ اکنامک فورم (ڈبلیو ای ایف) کے سالانہ اجلاس 2026 کے موقع پر ہونے والی ایک ملاقات کے دوران اپنے اقتصادی روابط کا جائزہ لیا اور سرمایہ کاری پر مبنی تعاون کو مزید مضبوط بنانے پر اتفاق کیا۔

اس سلسلے میں 20 جنوری کو ڈیووس میں وزیرِ خزانہ محمد اورنگزیب اور متحدہ عرب امارات کے وزیرِ مملکت برائے مالیاتی امور محمد الحسینی کے درمیان ہونے والی ملاقات میں تبادلہ خیال کیا گیا۔ ملاقات میں دونوں جانب سے دوطرفہ اقتصادی تعلقات، علاقائی صورتحال اور طویل مدتی سرمایہ کاری کی شراکت داری کو وسعت دینے کے طریقوں پر بحث کی گئی۔