عالمی منڈی میں سونے، چاندی اور پلاٹینم کی قیمتوں میں ریکارڈ اضافے کا سلسلہ برقرار

سونے کی قیمتوں نے جمعہ کو ایک اور نیا ریکارڈ قائم کردیا جب کہ جیو پولیٹیکل (جغرافیائی سیاسی) تناؤ اور معاشی غیر یقینی صورتحال کے باعث امریکی اثاثوں پر اعتماد میں کمی کی وجہ سے چاندی اور پلاٹینم کی قیمتیں بھی اپنی بلند ترین سطح پر پہنچ گئیں۔

عالمی مارکیٹ میں اسپاٹ گولڈ کی قیمت 0.3 فیصد اضافے کے ساتھ 4,951.91 ڈالر فی اونس پر آگئی جب کہ اس سے قبل ٹریڈنگ کے دوران سونا 4,966.59 ڈالر کی نئی ریکارڈ سطح تک پہنچ گیا تھا۔

فروری کی ترسیل کے لیے امریکی گولڈ فیوچرز کی قیمت 0.8 فیصد اضافے کے ساتھ 4,952.80 ڈالر فی اونس تک پہنچ گئی۔

امریکہ اور اس کے اثاثوں پر اعتماد متزلزل ہوچکا ہے، شاید مستقل طور پر، اور یہی وجہ ہے کہ سرمایہ قیمتی دھاتوں کی طرف جارہا ہے۔ اسی لیے یہاں رپچر جیسی اصطلاح استعمال کی جارہی ہے۔

ڈالر انڈیکس جمعہ کو دو ہفتوں کی کم ترین سطح پر رہا جس میں ہفتے کے دوران 1 فیصد کمی واقع ہوئی جس سے ڈالر کی قیمت میں فروخت ہونے والی دھاتیں غیر ملکی خریداروں کے لیے سستی ہو گئیں۔ ہفتے کے آغاز میں ٹرمپ کی جانب سے یورپی یونین پر نئی ٹیرف (محصولات) کی دھمکیوں کے باعث سرمایہ کاروں میں خوف و ہراس پھیل گیا تھا جس سے ڈالر کی فروخت میں اضافہ ہوا، تاہم بعد میں اس میں کچھ بہتری دیکھی گئی۔

برسلز میں جمعرات کی رات دیر گئے ہونے والے ہنگامی سربراہی اجلاس کے دوران، یورپی یونین کے رہنماؤں نے گرین لینڈ کے معاملے پر امریکی صدر ڈونلڈ ٹرمپ کے ’یو ٹرن‘ پر سکھ کا سانس لیا، تاہم ساتھ ہی یہ انتباہ بھی جاری کیا کہ اگر ٹرمپ نے انہیں دوبارہ دھمکایا تو وہ جوابی کارروائی کے لیے تیار ہیں۔

دوسری جانب امریکی صدر نے دعویٰ کیا ہے کہ انہوں نے نیٹو کے ساتھ ایک معاہدے کے تحت گرین لینڈ تک امریکہ کی مکمل اور مستقل رسائی حاصل کر لی ہے۔

کسی بھی (ممکنہ) معاہدے کی تفصیلات تاحال غیر واضح ہیں جبکہ ڈنمارک نے اس بات پر اصرار کیا ہے کہ جزیرے پر اس کی خودمختاری کسی صورت قابلِ بحث نہیں ہے۔

اسپاٹ سلور (چاندی) کی قیمت 2.6 فیصد اضافے کے ساتھ 98.71 ڈالر فی اونس ہو گئی جبکہ اس سے قبل یہ 99.20 ڈالر کی ریکارڈ سطح کو چھو چکی تھی۔

مارکیٹیں توقع کررہی ہیں کہ فیڈرل ریزرو 2026 کے دوسرے نصف میں دو مرتبہ 0.25 فیصد شرح سود میں کمی کرے گا جس سے غیر منافع بخش سونے کی کشش میں اضافہ ہوگا۔

اسپاٹ پلاٹینم 0.4 فیصد اضافے کے ساتھ 2,639.40 ڈالر فی اونس پر پہنچ گیا، جبکہ دن کے آغاز میں یہ 2,684.43 ڈالر کے ریکارڈ سطح تک پہنچ چکا تھا۔ اس دوران پیلاڈیم 0.9 فیصد کمی کے ساتھ 1,903.10 ڈالر پر ٹریڈ ہوا۔