چین کی ہائی سینس کی ایئر لنک کی ذیلی کمپنی کے ساتھ شراکت داری، پاکستان میں سرمایہ کاری کا ارادہ

سلیکٹ ٹیکنالوجیز لمیٹڈ، جو ایئر لنک کمیونیکیشن لمیٹڈ کی مکمل ملکیت والی سبسڈری ہے، نے عالمی کنزیومر الیکٹرانکس کی کمپنی ہائی سینس کے ساتھ پاکستان میں گھریلو آلات کی مقامی تیاری اور تقسیم کے لیے اسٹریٹجک شراکت داری کا اعلان کیا ہے۔

ٹیکنالوجی فرم نے یہ پیش رفت پاکستان اسٹاک ایکسچینج کو جمعرات کو بھیجے گئے نوٹس میں شیئر کی۔

نوٹس کے مطابق کہ سلیکٹ ٹیکنالوجیز لمیٹڈ نے ہائی سینس، جو ایک معروف عالمی کنزیومر الیکٹرانکس برانڈ ہے اور جس کا گروپ ریونیو 30.24 ارب امریکی ڈالر ہے، کے ساتھ پاکستان میں اسمارٹ ٹی وی اور ایئر کنڈیشنرز سمیت گھریلو آلات کی تیاری اور تقسیم کے لیے اسٹریٹجک شراکت داری قائم کی ہے۔

نوٹس میں مزید کہا گیا کہ یہ تعاون ہائی سینس کی عالمی ٹیکنالوجی قیادت اور ایئر لنک گروپ کی مضبوط مقامی مینوفیکچرنگ اور قومی سطح پر تقسیم کی صلاحیتوں کو یکجا کرتا ہے۔

ایئر لنک نے بتایا کہ اس شراکت داری کے تحت ہائی سینس نے مستقبل قریب میں اس منصوبے میں براہِ راست سرمایہ کاری کرنے کا ارادہ ظاہر کیا ہے، جو پاکستانی مارکیٹ میں اس کی طویل المدتی دلچسپی کو ظاہر کرتا ہے۔

نوٹس میں مزید کہا گیا کہ یہ اتحاد مقامی مینوفیکچرنگ کو مضبوط کرے گا، مصنوعات کی دستیابی کو بڑھائے گا اور مقامی صارفین کی ضروریات کے مطابق اعلیٰ معیار کے گھریلو آلات فراہم کرے گا۔

ہائی سینس ایک معروف چینی ملٹی نیشنل کمپنی ہے جو کنزیومر الیکٹرانکس اور گھریلو آلات کی تیاری میں مصروف عمل ہے۔

دریں اثنا، ایئر لنک کمیونیکیشن لمیٹڈ جنوری 2014 میں پاکستان میں پرائیویٹ لمیٹڈ کمپنی کے طور پر قائم ہوئی اور اپریل 2019 میں پبلک لمیٹڈ کمپنی میں تبدیل کی گئی۔

کمپنی کمیونیکیشن اور آئی ٹی سے متعلق مصنوعات اور خدمات، بشمول اسمارٹ فونز، ٹیبلیٹس، لیپ ٹاپ کے لوازمات اور متعلقہ مصنوعات کی درآمد، برآمد، تقسیم، شناخت، ہول سیل اور ریٹیل میں سرگرم ہے۔

اسی دوران، زاریہ لمیٹڈ، ایک ڈیجیٹل بی ٹو بی پلیٹ فارم، نے اعلان کیا کہ اس نے وانگ چونگ زی جون چانگ اگری لمیٹڈ کے ساتھ ابتدائی مرحلے کے لیے 2 ملین ڈالر مالیت کے طویل مدتی تعاون کے اسٹریٹجک میمورنڈم آف انڈرسٹینڈنگ پر دستخط کیے ہیں۔