ٹرمپ ٹیرف کا خطرہ ٹلنے کے بعد خام تیل کی قیمتیں گرگئیں

تیل کی قیمتوں میں جمعرات کو معمولی اضافہ دیکھنے میں آیا، جس کی وجہ امریکی صدر ڈونلڈ ٹرمپ کی جانب سے گرین لینڈ پر قبضے کے لیے ٹیرف عائد کرنے کی دھمکی واپس لینا اور یورپ کے ساتھ تجارتی تنازع کے خطرات کم ہونا تھا، جس سے عالمی معیشت اور تیل کی طلب پر مثبت اثر پڑا۔

برینٹ کرُوڈ کی قیمت 10 سینٹ یا 0.15 فیصد اضافے کے ساتھ 65.34 ڈالر فی بیرل رہی، جبکہ ویسٹ ٹیکساس انٹرمیڈیٹ مارچ کے لیے 14 سینٹ یا 0.23 فیصد اضافے کے ساتھ 60.76 ڈالر فی بیرل پر بند ہوئی۔

تیل کی قیمتوں میں اضافہ منگل کو 1.5 فیصد سے زائد اور بدھ کو 0.4 فیصد سے زائد ریکارڈ کیا گیا تھا، جس کی ایک وجہ اوپیک پلس کے رکن قازقستان کی جانب سے اس کے تینگیز اور کورولیو آئل فیلڈز میں بجلی کی تقسیم کے مسائل کے سبب پیداوار روکنا تھی۔

صدر ٹرمپ نے بدھ کو زور دے کر کہا کہ طاقت کے استعمال کا کوئی ارادہ نہیں ہے اور انہوں نے اشارہ دیا کہ ڈنمارک کے زیرِ انتظام گرین لینڈ کے تنازع کو حل کرنے کے لیے ایک معاہدہ ممکن ہے، جو عشروں میں ٹرانس اٹلانٹک تعلقات میں سب سے بڑے اختلاف کو ختم کر سکتا ہے۔

چین فیوچرز کمپنی کے چیف ریسرچر منگ یو گاؤ نے کہا کہ گرین لینڈ پر ممکنہ معاہدہ امریکہ اور یورپ کے درمیان تجارتی جنگ کے خطرات کو کم کرے گا اور عالمی معیشت اور تیل کی طلب کے لیے معاون ثابت ہوگا۔

انہوں نے مزید کہا کہ امریکی فوجی کارروائی کے خدشات ایران کے حوالے سے ابھی ختم نہیں ہوئے، جس سے بھی تیل کی قیمتوں کو حمایت مل رہی ہے۔ آن لائن بروکر آئی جی کے تجزیہ کار ٹونی سائکامور کے مطابق، گرین لینڈ فریم ورک اور ایران میں اضافی کارروائی نہ ہونے کی صورتحال میں تیل کی قیمتیں 60 ڈالر فی بیرل کے قریب مستحکم رہیں گی۔

مارکیٹ کے ذرائع کے مطابق امریکی خام تیل اور پٹرول کے ذخائر میں اضافہ ہوا جبکہ ڈسٹلیٹ اسٹاک کم ہوا۔ امریکی پیٹرولیم انسٹیٹیوٹ کے اعداد و شمار کے مطابق 16 جنوری کو ختم ہونے والے ہفتے میں خام تیل کے ذخائر 3.04 ملین بیرل بڑھ گئے، پٹرول کے ذخائر 6.21 ملین بیرل بڑھے جبکہ ڈسٹلیٹ ذخائر 33 ہزار بیرل کم ہوئے۔

ہائی ٹونگ فیوچرز کے تجزیہ کار یانگ این کے مطابق، زیادہ خام تیل کے ذخائر مارکیٹ میں اضافے کو محدود کر رہے ہیں اور تیل کی قیمتوں میں مزید بڑے اضافے کی راہ میں رکاوٹ ہیں۔