وزیراعظم کی آئی ایم ایف سربراہ کو پاکستان کے بہتر ہوتے میکرو اکنامک اشاریوں پر بریفنگ

وزیراعظم شہباز شریف نے بدھ کو آئی ایم ایف کی منیجنگ ڈائریکٹر کرسٹلینا جورجیوا کو پاکستان کے بہتر ہوتے میکرو اکنامک اشاریے، استحکام کے اقدامات اور ساختی اصلاحات میں پیشرفت کے بارے میں بریفنگ دی۔

وزیراعظم ہاؤس ( پی ایم او) کے بیان میں کہا گیا ہے کہ وزیراعظم نے سوئٹزرلینڈ کے شہر ڈیووس میں 56 ویں ورلڈ اکنامک فورم کی سالانہ میٹنگ کے موقع پر آئی ایم ایف کے سربراہ سے ملاقات کے دوران پاکستان کے مالی نظم و ضبط، محصولات کے حصول اور پائیدار ترقی کے عزم پر زور دیا ہے۔

پی ایم او کے بیان کے مطابق ”وزیراعظم نے مینجنگ ڈائریکٹر کو پاکستان کے بہتر ہوتے میکرو اکنامک اشاریوں، استحکام کے اقدامات، اور ساختی اصلاحات میں پیش رفت سے آگاہ کیا۔“

آئی ایم ایف کی مینجنگ ڈائریکٹر نے پاکستان کی اصلاحی کوششوں کو تسلیم کیا اور اس کی قدر کی، اور طویل مدتی معاشی مضبوطی کو یقینی بنانے کے لیے اصلاحی عمل کی رفتار برقرار رکھنے کی اہمیت پر زور دیا۔

وزیراعظم ہاؤس ( پی ایم او) کے مطابق ”دونوں فریقین نے عالمی معیشت کے منظرنامے، ابھرتی ہوئی معیشتوں کے سامنے آنے والے چیلنجز، اور معاشی استحکام کے تحفظ میں کثیر الجہتی حمایت کی اہمیت پر خیالات کا تبادلہ کیا۔“

ملاقات میں نائب وزیراعظم اور وزیر خارجہ اسحاق ڈار، وفاقی وزیر برائے اقتصادی امور احد خان چیمہ، وفاقی وزیر برائے خزانہ و محصولات محمد اورنگزیب اور وفاقی وزیر برائے اطلاعات و نشریات عطااللہ تارڑ بھی شریک ہوئے۔

رواں مالی سال کے لیے پاکستان کے پروڈکٹ (جی ڈی پی) کا تخمینہ اکتوبر 2025 کے ورلڈ اکنامک آؤٹ لک میں لگائے گئے 3.6 فیصد سے کم ہو کر 3.2 فیصد ہو گیا ہے۔

آئی ایم ایف نے اپنی تازہ ترین رپورٹ ”ورلڈ اکنامک آؤٹ لک 2026 اپ ڈیٹ: عالمی معیشت – مختلف قوتوں کے درمیان مستحکم“ میں اندازہ لگایا ہے کہ پاکستان کی جی ڈی پی کی شرح نمو 2025 میں 3 فیصد، 2026 میں 3.2 فیصد اور 2027 میں 4.1 فیصد تک پہنچ سکتی ہے۔

عالمی بینک نے مالی سال 2025–26 میں پاکستان کی جی ڈی پی گروتھ 3 فیصد رہنے اور مالی سال 2026–27 میں 3.4 فیصد تک بڑھنے کی پیش گوئی کی ہے۔