یوکرین پر روسی حملہ، اوڈیسا میں توانائی اور گیس ڈھانچے کو نقصان

یوکرین کے جنوبی علاقے اوڈیسا میں روس کے تازہ ڈرون حملے سے توانائی، گیس اور رہائشی ڈھانچے کو نقصان پہنچا ہے۔ علاقائی گورنر اولیگ کیپر کے مطابق حملہ اتوار اور پیر کی درمیانی شب کیا گیا جس کے نتیجے میں کم از کم ایک شخص زخمی ہوا۔

گورنر کیپر نے ٹیلیگرام پر جاری بیان میں بتایا کہ روسی افواج نے اوڈیسا کے مختلف علاقوں کو نشانہ بنایا جہاں ڈرون حملوں کے باعث بجلی کی ترسیل کے نظام میں رکاوٹ پیدا ہوئی اور گیس لائنوں کو نقصان پہنچا۔ ان کے بقول نقصان کی مکمل تفصیلات اکھٹی کی جارہی ہیں جبکہ مرمت اور بحالی کے عمل کے لیے ہنگامی ٹیموں کو متحرک کردیا گیا ہے۔

گورنر کیپر نے یہ بھی بتایا کہ حملے میں ایک اہم تنصیب کو نقصان پہنچا ہے تاہم انہوں نے سیکیورٹی وجوہات کی بنیاد پر اس تنصیبات کے نام یا نوعیت کو ظاہر کرنے سے گریز کیا۔ حکام کا کہنا ہے کہ خطے میں بنیادی ڈھانچے کو نشانہ بنانا یوکرین کے بجلی اور توانائی کے نظام کو غیر مستحکم کرنے کی کوشش کا حصہ ہے، جو گزشتہ کئی ماہ سے بار بار روسی حملوں کی زد میں ہے۔

اوڈیسا کے مرکزی ضلع میں ایک رہائشی عمارت پر ڈرون گرنے سے ایک کثیر المنزلہ عمارت کا حصہ بری طرح متاثر ہوا۔ حکام کے مطابق دو فلیٹوں میں آگ لگ گئی، عمارت کا اگلا حصہ ٹوٹ پھوٹ کا شکار ہوا اور کھڑکیاں چکنا چور ہوگئیں۔ اسی کے ساتھ پارکنگ میں کھڑی متعدد گاڑیوں کو بھی نقصان پہنچا۔

فوجی حکام کا کہنا ہے کہ فضائی دفاعی نظام نے کئی ڈرون گرا دیے تاہم کچھ ڈرون ہدف تک پہنچنے میں کامیاب رہے۔ ادھر اوڈیسا میں ریسکیو ٹیموں اور فائر بریگیڈ نے متاثرہ عمارت سے رہائشیوں کو محفوظ مقام پر منتقل کیا اور آگ پر قابو پالیا گیا۔

اوڈیسا جنوبی یوکرین کا اسٹریٹجک بندرگاہی شہر ہے، جسے جنگ شروع ہونے سے اب تک متعدد بار روسی میزائل اور ڈرون حملوں کا نشانہ بنایا جاچکا ہے۔ حکام نے شہریوں سے محتاط رہنے اور ایئر الرٹ وارننگز پر سختی سے عمل کرنے کی اپیل کی ہے۔