کمبوڈیا نے تھائی لینڈ سے سرحدی مذاکرات ملائیشیا منتقل کرنے کی درخواست کر دی

کمبوڈیا نے تھائی لینڈ سے درخواست کی ہے کہ دو طرفہ مذاکرات تھائی لینڈ کے بجائے ایک غیر جانبدار مقام کوالالمپور میں منعقد کیے جائیں۔

اے ایف پی کے مطابق یہ مطالبہ ایسے وقت سامنے آیا ہے جب دونوں ممالک کے درمیان دو ہفتوں سے جاری خونی سرحدی جھڑپوں کے بعد جنگ بندی کی شرائط پر بات چیت متوقع ہے۔

کمبوڈین وزیرِ دفاع ٹی سیہا نے اپنے تھائی ہم منصب کو لکھے گئے خط میں مؤقف اختیار کیا کہ سرحد پر جاری لڑائی کے باعث سکیورٹی خدشات ہیں، اس لیے مذاکرات کسی محفوظ اور غیر جانبدار مقام پر ہونے چاہییں۔ ان کے مطابق آسیان کے چیئرمین کی حیثیت سے ملائیشیا مذاکرات کی میزبانی پر آمادہ ہے۔

دوسری جانب تھائی لینڈ نے کہا ہے کہ مذاکرات کے مقام پر ابھی مشاورت جاری ہے۔ تھائی وزیرِ دفاع نے اصرار کیا کہ چنتھابوری محفوظ علاقہ ہے اور وہاں لڑائی نہ ہونے کے برابر ہے۔

واضح رہے کہ دونوں ممالک کے دیرینہ سرحدی تنازع میں حالیہ جھڑپوں کے نتیجے میں 40 سے زائد افراد ہلاک اور نو لاکھ سے زیادہ شہری بے گھر ہو چکے ہیں، جبکہ ایک سابقہ جنگ بندی بھی ختم ہوچکی ہے۔