چیف آف ڈیفنس فورسز سید عاصم منیر کو سعودی عرب کا اعلیٰ ترین قومی اعزاز تفویض

سعودی عرب کا اعلیٰ ترین قومی اعزاز چیف آف ڈیفنس فورسز (سی ڈی ایف) اور چیف آف آرمی اسٹاف فیلڈ مارشل سید عاصم منیر کو بھی عطا کردیا گیا ہے۔

آئی ایس پی آر کے مطابق یہ اعزاز خادم حرمین شریفین شاہ سلمان بن عبدالعزیز آل سعود کے جاری کردہ شاہی فرمان کے تحت دیا گیا، جس کے تحت فیلڈ مارشل عاصم منیر کو کنگ عبدالعزیز میڈل (اعلیٰ درجے) سے نوازا گیا۔

دورے کے دوران چیف آف ڈیفنس فورسز نے سعودی عرب کے وزیر دفاع شہزادہ خالد بن سلمان بن عبدالعزیز آل سعود سے ملاقات کی، جس میں باہمی دلچسپی کے امور، علاقائی سیکیورٹی صورتحال، دفاعی و عسکری تعاون، اسٹریٹجک شراکت داری اور بدلتے ہوئے جغرافیائی و سیاسی چیلنجز پر تبادلہ خیال کیا گیا۔

آئی ایس پی آر کے مطابق اس ملاقات میں پاکستان اور سعودی عرب کے درمیان گہرے، تاریخی اور برادرانہ تعلقات کی ایک بار پھر توثیق کی گئی۔

اعلامیے میں مزید کہا گیا کہ سعودی قیادت نے فیلڈ مارشل عاصم منیر کی پیشہ ورانہ صلاحیتوں اور اسٹریٹجک وژن کو سراہتے ہوئے پاکستان اور سعودی عرب کے دیرینہ برادرانہ تعلقات کو مزید مضبوط بنانے کے لیے ان کے عزم کی تعریف کی۔

اعلامیے کے مطابق فیلڈ مارشل عاصم منیر نے خادمِ حرمین شریفین اور سعودی قیادت کا اعزاز پر شکریہ ادا کیا اور اسے پاکستان اور سعودی عرب کے درمیان مضبوط اور پائیدار تعلقات کی علامت قرار دیا۔

انہوں نے سعودی عرب کی سلامتی، استحکام اور خوشحالی کے لیے پاکستان کے غیر متزلزل عزم کا بھی اعادہ کیا۔

سعودی عرب کا یہ اعلیٰ ترین اعزاز فیلڈ مارشل عاصم منیر کی نمایاں عسکری خدمات، قیادت اور پاکستان و سعودی عرب کے درمیان دفاعی تعاون، اسٹریٹجک ہم آہنگی اور ادارہ جاتی روابط کے فروغ میں ان کے مرکزی کردار کا اعتراف ہے۔

یہ اعزاز علاقائی امن و استحکام بالخصوص انسداد دہشت گردی اور سیکیورٹی کے شعبے میں مسلسل تعاون کے لیے ان کی خدمات کا بھی مظہر ہے۔