ٹی پی ایل انشورنس کی خریداری: ٹی پی ایل کارپ نے جاز انٹرنیشنل کو شیئر فروخت کی منظوری دے دی

ٹی پی ایل کارپ لمیٹڈ نے بدھ کو اعلان کیا کہ بورڈ نے اپنی ذیلی کمپنی ٹی پی ایل انشورنس لمیٹڈ کی فروخت کے لیے شیئر پرچیز ایگریمنٹ (ایس پی اے) کے حتمی دستخط کی منظوری دے دی ہے، جس کا خریدار جاز انٹرنیشنل ہولڈنگ لمیٹڈ ہوگا۔

یہ اعلان آج پاکستان اسٹاک ایکسچینج (پی ایس ایکس) کو بھیجے گئے نوٹس کے ذریعے کیا گیا جس میں بتایا گیا کہ معاہدہ اس وقت مکمل نہیں ہوا اور اسے تمام قانونی اور ریگولیٹری منظوریوں کے بعد حتمی شکل دی جائے گی۔

ابتدائی طور پر 8 ستمبر کو ٹی پی ایل کارپ لمیٹڈ کے بورڈ آف ڈائریکٹرز نے اس ممکنہ معاہدے پر اتفاق کیا تھا جس کے تحت جاز انٹرنیشنل ہولڈنگ لمیٹڈ ٹی پی ایل انشورنس کے شیئرز خرید کر اس کا کنٹرول سنبھالے گی۔

ابتدائی طور پر خریدار کے طور پر ویون گروپ ہولڈنگ کمپنی لمیٹڈ یا اس کی متعلقہ کمپنیاں ظاہر کی گئی تھیں، تاہم بعد ازاں اسے باضابطہ طور پر جاز انٹرنیشنل ہولڈنگ لمیٹڈ میں تبدیل کر دیا گیا، جس کا اعلان 16 دسمبر 2025 کو عارف حبیب لمیٹڈ، جو اس معاہدے کا انتظام کر رہی ہے، نے کیا۔

ٹی پی ایل کارپ لمیٹڈ ٹی پی ایل انشورنس میں اکثریتی شیئر ہولڈر ہے جس کے پاس 52.87 فیصد حصص ہیں، اس کے بعد فنش فنڈ فار انڈسٹریل کوآپریشن لمیٹڈ کے 17.02 فیصد اور اینٹ وِکِلنگس گیزیلشافت ایم بی ایچ کے 15.87 فیصد حصص ہیں۔