سپرنیٹ لمیٹڈ نے عالمی منڈی میں قدم رکھ دیا، فونکس گلوبل ایف زیڈ ای کا ایتھینا ٹیلی کام سے معاہدہ

پاکستان کی ٹیکنالوجی پر مرکوز کمپنی سپرنیٹ لمیٹڈ نے بین الاقوامی توسیع کی جانب اہم قدم بڑھایا ہے، جب اس کی متحدہ عرب امارات میں قائم ذیلی کمپنی، فونکس گلوبل ایف زیڈ ای نے ایتھینا ٹیلی کمیونیکیشن ایکوئپمنٹ ٹریڈنگ کمپنی ایل ایل سی کے ساتھ خطے اور عالمی منڈیوں میں بحری رابطے کے منصوبوں کے لیے معاہدہ کیا۔

کمپنی نے یہ پیشرفت بدھ کو پاکستان اسٹاک ایکسچینج کو جاری کردہ نوٹس میں شیئر کی۔

نوٹس کے مطابق فونکس گلوبل ایف زیڈ ای نے ایتھینا ٹیلی کمیونیکیشن کے ساتھ 09 دسمبر 2025 سے مؤثر جائنٹ کولیبریشن معاہدہ کیا ہے۔ اس معاہدے کے تحت دونوں کمپنیاں بحری رابطے، حفاظت، سیکیورٹی، ارتھ آبزرویشن، آئی او ٹی اور متعلقہ ڈیجیٹل انفراسٹرکچر کے حل کو فروغ دینے اور فراہم کرنے کے لیے تعاون کریں گی۔

مزید برآں اس تعاون میں مشترکہ برانڈڈ پیشکشیں، مشترکہ سیلز اور مارکیٹنگ سرگرمیاں اور پروجیکٹ کی بنیاد پر تجارتی و ریونیو شیئرنگ کے انتظامات شامل ہیں۔ یہ معاہدہ تین سال کے لیے مؤثر رہے گا اور باہمی رضامندی کی صورت میں اسے تجدید کرنے کا اختیار موجود ہے۔

کمپنی کے مطابق یہ تعاون سپرنیٹ لمیٹڈ کو فونکس گلوبل ایف زیڈ ای کے ذریعے بڑھتی ہوئی عالمی بحری رابطے کی منڈیوں میں داخل ہونے اور ایتھینا ٹیلی کام کی مضبوط تکنیکی مہارت اور سپرنیٹ کے تجارتی اثر و رسوخ سے فائدہ اٹھاتے ہوئے علاقائی اور بین الاقوامی آمدنی کے ذرائع کو وسعت دینے کے قابل بناتا ہے۔

اگرچہ اس مرحلے پر معاہدے کے مالی اثرات کا اندازہ لگانا ممکن نہیں اور یہ مخصوص منصوبوں پر منحصر ہوں گے، تاہم کمپنی توقع کرتی ہے کہ اس تعاون سے طویل مدتی مثبت تجارتی فوائد حاصل ہوں گے۔

واضح رہے کہ سپرنیٹ پاکستان کی پہلی ٹیکنالوجی کمپنی ہے جو پی ایس ایکس کے جیم بورڈ پر درج ہے۔ 1995 میں قائم ہونے والی یہ کمپنی ملک کے نمایاں ٹیلی کمیونی کیشن سروس فراہم کنندگان اور سسٹمز انٹیگریٹرز میں سے ایک ہے۔