آسٹریلیا کے بونڈی بیچ پر فائرنگ، 9 افراد ہلاک

آسٹریلیا کے مشہور سیاحتی مقام بونڈی بیچ پر دو مشتبہ مسلح افراد نے فائرنگ کر دی، جس کے نتیجے میں 9 افراد ہلاک اور متعدد زخمی ہو گئے۔ اچانک فائرنگ سے علاقے میں شدید خوف و ہراس پھیل گیا۔عینی شاہدین کے مطابق لاشیں ساحل پر بکھری پڑی تھیں۔

نیو ساؤتھ ویلز پولیس کے مطابق زخمی ہونے والے 11 افراد کو فوری طور پر مختلف اسپتالوں میں منتقل کیا گیا۔ حکام نے بتایا کہ ایک مبینہ حملہ آور موقع پر ہی مارا گیا جبکہ دوسرا شدید زخمی حالت میں ہے، تاہم واقعے کے محرکات سے متعلق تاحال کوئی حتمی بیان سامنے نہیں آیا۔

اتوار کی سہ پہر ساحل پر یہودی تہوار ہنوکہ کے موقع پر “چانوکہ بائے دی سی” کے نام سے ایک تقریب منعقد ہونا تھی، تاہم حکام نے واقعے کو کسی ممکنہ یہود دشمن حملے سے جوڑنے پر فی الحال تبصرہ نہیں کیا۔

عینی شاہدین کے مطابق فائرنگ طویل وقت تک جاری رہی اور بڑے ہتھیار استعمال کیے گئے۔ ایک غیر ملکی طالبعلم نے بتایا کہ فائرنگ کی آوازیں مسلسل سنائی دیتی رہیں۔ پولیس کے مطابق شام 6 بج کر 45 منٹ پر فائرنگ کی اطلاع ملی، جس کے بعد علاقے کو گھیرے میں لے کر تلاشی شروع کر دی گئی۔

دوسری جانب ساحل کے قریب مشکوک اشیاء کی جانچ کی جا رہی ہے جبکہ علاقے میں داخلے پر پابندی عائد ہے۔ آسٹریلوی وزیراعظم انتھونی البانیز نے واقعے کو افسوسناک اور دل دہلا دینے والا قرار دیتے ہوئے متاثرین سے اظہارِ ہمدردی کیا۔