ٹی 20 ورلڈ کپ سے قبل اسکواڈ میں تبدیلی کی توقع نہیں، سلمان علی آغا

پاکستان ٹی ٹوئنٹی کرکٹ ٹیم کے کپتان سلمان علی آغا نے کہا ہے کہ میرا نہیں خیال کہ ورلڈ کپ سے قبل ٹی ٹوئنٹی اسکواڈ میں کوئی بڑی تبدیلی ہوگی، ورلڈ کپ میں ہمارا یہی کمبی نیشن ہوگا۔

پاکستان کرکٹ بورڈ (پی سی بی) کے پوڈکاسٹ میں گفتگو کرتے ہوئے انہوں نے کہا کہ سب کھلاڑیوں کو رولز دے دیے ہیں، اسی رولز کے ساتھ آگے بڑھیں گے۔ 

آئی سی سی ٹی 20 ورلڈ کپ آئندہ برس فروری اور مارچ میں مشترکہ طور پر بھارت اور سری لنکا میں کھیلا جائے گا۔ ایونٹ 7 فروری سے 8 مارچ تک شیڈول ہے۔ پاکستان کو گروپ اے میں بھارت، امریکہ، نمیبیا اور نیدرلینڈز کے ساتھ رکھا گیا ہے۔

سلمان علی آغا نے آئندہ میگا ایونٹ سے قبل کپتانی میں کسی ممکنہ تبدیلی کی رپورٹس کو بھی مسترد کر دیا اور کہا فی الحال پاکستان ٹیم میری قیادت میں ٹی 20 ورلڈ کپ میں حصہ لے گی۔

انہوں نے کہا کہ ورلڈکپ سے قبل 6 میچز باقی ہیں، ہمیں تسلسل کے ساتھ کھیلنا ہوگا، ہم 6 میچز میں کوئی بڑی تبدیلی نہیں کرسکتے۔ کیونکہ 6 ماہ انہی کے ساتھ کھیلا ہے اور ریزلٹ آنا شروع ہو گئے ہیں۔

ان کا کہنا تھا کہ سینئر کھلاڑیوں کو سری لنکا کی پچز کا اندازہ ہے، نئے کھلاڑیوں کو ورلڈکپ سے قبل سری لنکا سیریز کا فائدہ ہوگا، ورلڈکپ سے قبل یہ سیریز ہمارے لیے فائدہ مند ہوگی۔

کاپی رائٹ بزنس ریکارڈر 2025