فیلڈ مارشل عاصم منیر اور مصری وزیر خارجہ کا دفاع و سیکیورٹی تعلق مضبوط بنانے کا عزم

چیف آف آرمی اسٹاف فیلڈ مارشل سید عاصم منیر سے مصر کے وزیر خارجہ ڈاکٹر بدر احمد محمد عبدالعاطی نے ملاقات کی۔

فریقین نے دونوں ممالک کے درمیان دوطرفہ تعلقات کا جائزہ لیا جس میں دفاع اور سکیورٹی تعاون، عسکری روابط، تربیتی اشتراک عمل اور علاقائی امن و استحکام پر خصوصی توجہ دی گئی۔

آئی ایس پی آر کے مطابق بات چیت میں دفاع اور وسیع تر اسٹریٹجک شعبوں میں روابط اور دیرینہ تعلقات مستحکم کرنے کے عزم کا اعادہ کیا گیا۔

مصر کے وزیر خارجہ نے مصر کی قیادت کی جانب سے نیک خواہشات کا پیغام بھی دیا اور پاکستان کے ساتھ تمام شعبوں میں تعاون کو فروغ دینے میں مصر کی مسلسل دلچسپی کا اظہار کیا۔

فریقین نے ابھرتے ہوئے چیلنجز خاص طور پر خطے کی بدلتی سیکیورٹی صورتحال کے تناظر میں اعلیٰ سطح کے پائیدار تبادلوں کی اہمیت پر زور دیا۔

پاکستان اور مصر نے اتوار کو تجارتی، سرمایہ کاری، سیکیورٹی، سیاسی، زرعی اور عوامی روابط سمیت تمام شعبوں میں دوطرفہ تعلقات کو بڑھانے کے عزم کا اعادہ کیا۔

یہ ملاقات اسلام آباد میں وزارت خارجہ میں وزیرِ مملکت اور وزیر خارجہ اسحاق ڈار اور مصر کے وزیر خارجہ ڈاکٹر بدر عبد اللاطی کے درمیان ہوئی تھی۔