پاکستان کی مصری صنعتی گروپ ایل سویدی الیکٹرک کو معدنیات و آئی ٹی میں سرمایہ کاری کی دعوت

وفاقی وزیر تجارت جام کمال خان نے پیر کو مصر کی معروف ملٹی نیشنل صنعتی کمپنی ایل سویدی الیکٹرک کے صدر و سی ای او انجینئر احمد ایل سویدی کے ساتھ ملاقات کی۔

ملاقات میں انجینئر احمد ایل سویدی نے پاکستان میں کمپنی کی موجودہ سرمایہ کاری پر اطمینان کا اظہار کیا۔

وفاقی وزیر نے ایل سویدی قیادت کو پاکستان کے معدنی شعبے میں ترقی کی نمایاں صلاحیتوں سے آگاہ کیا اور پالیسی اصلاحات، سرمایہ کار دوست فریم ورک، ابھرتے ہوئے پبلک پرائیویٹ پارٹنرشپ کے مواقع اور بڑے مقامی و بین الاقوامی کھلاڑیوں کی بڑھتی ہوئی دلچسپی کو اجاگر کیا۔

مزید برآں وزیر تجارت نے پاکستان کے تیزی سے بڑھتے ہوئے آئی ٹی اور ٹیکنالوجی سروسز کے شعبے میں سرمایہ کاری کے وسیع مواقع بھی ایل سویدی قیادت کے سامنے رکھے اور مصری کمپنیوں کو شراکت داری، جدت پر مبنی منصوبے اور ڈیجیٹل تجارتی تعاون تلاش کرنے کی دعوت دی۔

ایل سویدی الیکٹرک ایک مصری ملٹی نیشنل کمپنی ہے، جس کی بنیاد 1938 میں رکھی گئی تھی۔ یہ مربوط توانائی کے حل فراہم کرتی ہے، 19 ممالک میں موجود ہے اور 110 سے زائد ممالک میں اپنی مصنوعات برآمد کرتی ہے۔

مصری وفد نے پاکستان میں حالیہ اقتصادی ترقیات کا خیرمقدم کیا اور دوطرفہ تجارتی تعلقات کو مزید مضبوط کرنے میں گہری دلچسپی کا اظہار کیا۔

ملاقات کا اختتام اس بات پر ہوا کہ دونوں ممالک پاکستان اور مصر کے درمیان سرمایہ کاری اور صنعتی تعاون کو فروغ دینے کے لیے باہمی تعاون جاری رکھیں گے۔