افغانستان کو برآمدات کم، ملت ٹریکٹر کی نئی مارکیٹوں پر توجہ مرکوز

سیاسی غیر یقینی صورتحال کے باعث افغانستان کو برآمدات متاثر ہونے کے بعد پاکستانی ٹریکٹر ساز کمپنی ملّت ٹریکٹرز لمیٹڈ (ایم ٹی ایل) اب اپنی بیرونی موجودگی کو برقرار رکھنے اور وسعت دینے کے لیے میکسیکو، افریقہ اور سری لنکا سمیت نئی مارکیٹوں کی تلاش کر رہی ہے۔

کمپنی انتظامیہ نے منگل کو ایک کارپوریٹ بریفنگ سیشن میں معلومات فراہم کی، جس میں عارف حبیب لمیٹڈ (اے ایچ ایل) نے شرکت کی۔ سیشن میں کمپنی کی حالیہ کارکردگی اور مستقبل کے مواقع پر بات چیت کی گئی۔

انتظامیہ نے بتایا کہ کمپنی کی برآمدات کی مقدار پچھلے سال کے 2,761 یونٹس کے مقابلے میں کم ہو کر 2,607 یونٹس رہ گئی ہے۔

عارف حبیب لمیٹڈ (اے ایچ ایل) کی رپورٹ کے مطابق، افغانستان ایک اہم برآمدی مارکیٹ ہے لیکن وہاں سیاسی عدم استحکام کے باعث فروخت میں کمی آئی ہے۔ رپورٹ میں مزید کہا گیا کہ ایم ٹی ایل برآمدی مقدار کو برقرار رکھنے اور بڑھانے کے لیے میکسیکو، افریقہ اور ممکنہ طور پر سری لنکا جیسی نئی منڈیوں پر توجہ مرکوز کر رہی ہے۔

یہ پیشرفت اس وقت سامنے آئی جب حالیہ مہینوں میں پاکستان اور طالبان کی زیر قیادت افغانستان کی حکومت کے تعلقات کشیدہ ہوگئے جس کی بنیادی وجہ سیکیورٹی اور دہشت گردی کے حوالے سے شدید اختلافات ہیں۔ شدید فوجی تصادمات اور ناکام مذاکرات کے بعد تعلقات اب بھی کشیدہ ہیں۔

دریں اثنا، ایم ٹی ایل نے بتایا کہ اکتوبر 2025 میں حکومت کے گرین ٹریکٹر اسکیم کے تحت فروخت 2,000 یونٹس تک پہنچ گئی، جس سے ماہانہ وقتی اضافہ ہوا، تاہم انتظامیہ نے خبردار کیا کہ مسلسل ماہانہ نمو برقرار رکھنا مشکل ہے۔

عارف حبیب لمیٹڈ کے مطابق انتظامیہ آئندہ سال کچھ بہتری کی توقع کررہی ہے۔

اسی دوران ایم ٹی ایل کی انتظامیہ نے نوٹ کیا کہ نئے بیلاروس ٹریکٹرز مارکیٹ میں مقابلہ بڑھائیں گے۔ رپورٹ کے مطابق، یہ ٹریکٹر پہلے بھی مارکیٹ میں موجود ہیں اور ایم ٹی ایل ٹریکٹر سیکشن میں مضبوط 65 فیصد مارکیٹ شیئر رکھتی ہے، اس لیے انتظامیہ کسی نمایاں اثر کی توقع نہیں کر رہی۔

ملّت ٹریکٹرز لمیٹڈ ایک پبلک لمیٹڈ کمپنی ہے جو 1964 میں پاکستان میں قائم کی گئی۔ کمپنی بین الاقوامی سطح پر معروف ٹریکٹرز، ڈیزل جنریٹنگ سیٹ، پرائم موورز، ڈیزل انجنز اور فورک لفٹ ٹرکس کی تیاری اور فروخت میں مصروف ہے۔

30 جون 2024 تک کمپنی کی سالانہ پیداوار کی گنجائش ڈبل شفٹ کے حساب سے 30,000 ٹریکٹرز فی سال رہی۔