سعودی عرب کے ساتھ F-35 لڑاکا طیاروں کے ممکنہ معاہدے پر غور جاری ہے، صدر ٹرمپ

امریکی صدر ڈونلڈ ٹرمپ نے کہا ہے کہ وہ سعودی عرب کو لاک ہیڈ مارٹن کے تیار کردہ F-35 اسٹیلتھ لڑاکا طیاروں کی ممکنہ فروخت پر غور کر رہے ہیں۔

ٹرمپ نے ایئر فورس ون میں سوار صحافیوں کو بتایا کہ سعودی عرب کئی جنگی طیارے خریدنا چاہتا ہے اور انہوں نے مجھ سے کہا ہے کہ میں اس پر غور کروں۔ انہوں نے کہا کہ وہ بہت سے F-35 خریدنا چاہتے ہیں اور دراصل وہ اس سے بھی زیادہ لڑاکا طیارے خریدنے کے خواہاں ہیں۔

یہ پیش رفت ایسے وقت سامنے آئی جب ٹرمپ آئندہ ہفتے وائٹ ہاؤس میں سعودی ولی عہد محمد بن سلمان کی میزبانی کریں گے، جہاں ان سے توقع کی جاتی ہے کہ وہ اقتصادی اور دفاعی معاہدوں پر دستخط کریں گے۔

ٹرمپ نے بات چیت کے بارے میں پوچھے جانے پر کہا کہ یہ محض ملاقات نہیں بلکہ سعودی عرب کے ساتھ احترام پر مبنی تعلقات کی عکاسی ہے۔ انہوں نے مزید کہا کہ انہیں امید ہے کہ سعودی عرب جلد ابراہیم معاہدے میں شامل ہوگا، جس نے اسرائیل اور مسلم اکثریتی ممالک کے تعلقات معمول پر لانے میں مدد دی۔ ریاض نے فلسطینی ریاست کے قیام کے روڈ میپ سے معاہدے کی غیر موجودگی پر اپنی مخالفت ظاہر کی ہے۔

دوسری جانب پینٹاگون کی ایک انٹیلی جنس رپورٹ نے F-35 کے ممکنہ معاہدے پر تشویش ظاہر کی ہے، جس میں خبردار کیا گیا ہے کہ اگر فروخت جاری رہی تو چین طیارے کی جدید ٹیکنالوجی تک رسائی حاصل کر سکتا ہے، جیسا کہ نیویارک ٹائمز نے جمعرات کو رپورٹ کیا۔