سی سی پی کی کریسٹ گارمنٹس ، اسٹینڈ فارم معاہدے کی منظوری ، مسابقتی خدشات مسترد

کمپیٹیشن کمیشن آف پاکستان (سی سی پی) نے جاری بیان میں کریسٹ گارمنٹس انٹرنیشنل پرائیویٹ لمیٹڈ کو اسٹینڈفارم پاکستان پرائیویٹ لمیٹڈ کے حصول کی اجازت دے دی۔

بیان کے مطابق یہ سودا اندرونی کارپوریٹ ری اسٹرکچرنگ کا حصہ ہے، کیونکہ دونوں کمپنیاں ایک ہی گروپ کے شیئر ہولڈرز کی ملکیت اور انتظام میں ہیں۔

اسٹینڈفارم پاکستان دواسازی اور غذائی سپلیمنٹس کے شعبوں میں کام کرتی ہے اور اس کی 19 مختلف طبی شعبوں میں مصنوعات موجود ہیں، جن میں جوڑوں کے درد، درد کش ادویات، وٹامنز اور منرل سپلیمنٹس، معدے کی بیماریوں، اینٹی بایوٹکس اور ذہنی امراض کی دوائیں شامل ہیں۔

دوسری جانب کریسٹ گارمنٹس بنیادی طور پر ملبوسات کی تیاری کے کاروبار سے وابستہ ہے اور اس کی دواسازی یا غذائی سپلیمنٹس کے شعبوں میں کوئی سرگرمی نہیں ہے۔

سی سی پی نے تفصیلی جانچ کے بعد قرار دیا کہ مجوزہ حصول سے مارکیٹ میں کوئی افقی ، عمودی یا مجموعی نوعیت کی ہم آہنگی پیدا نہیں ہوگی اور نہ ہی اس سے مارکیٹ میں ارتکاز بڑھے گا۔

کمیشن کے مطابق پاکستان کی دواسازی اور غذائی سپلیمنٹس کی مارکیٹ میں اب بھی متعدد فعال کمپنیاں کام کر رہی ہیں، مسابقت کی سطح معتدل ہے اور نئی کمپنیوں کے داخلے کا سلسلہ جاری ہے۔

اس لیے یہ سودا نہ تو مسابقت میں کمی لائے گا اور نہ ہی کسی ایک کمپنی کو غلبہ دے گا۔

مزید کہا گیا کہ یہ لین دین دراصل گروپ کے اندرونی ڈھانچے کی تبدیلی ہے جس سے کنٹرول یا انتظام میں کوئی بنیادی فرق نہیں آئے گا۔

سی سی پی نے نشاندہی کی کہ مارکیٹ کے موجودہ حالات، مسابقتی دباؤ اور نئی کمپنیوں کے مواقع اس لین دین سے متاثر نہیں ہوں گے۔

چند روز قبل کمیشن نے نووارٹس فارما (پاکستان) لمیٹڈ کے حصول کی بھی منظوری دی تھی، جسے انٹرنیشنل انویسٹمنٹ ٹو لمیٹڈ نے خریدا۔

اس معاملے میں اگرچہ ذیابطیس، جوڑوں کے درد، مرگی اور امراض قلب جیسی چند ادویاتی اقسام میں معمولی ہم آہنگی دیکھی گئی، تاہم کمیشن کے مطابق دونوں کمپنیوں کے مشترکہ مارکیٹ شیئر اتنے بڑے نہیں تھے کہ مسابقت پر کوئی منفی اثر پڑے۔