گمبٹ ساؤتھ میں پی پی ایل کی گیس پیداوار اور ایل پی جی آؤٹ پٹ میں اضافہ

گمبٹ ساؤتھ گیس پروسیسنگ فسیلٹی (جی پی ایف ٹو ) سانگھڑ سندھ میں بہتر انتظام کے ذریعے اپنی گیس پروسیسنگ کی صلاحیت 55 ایم ایم ایس سی ایف ڈی سے بڑھا کر 60 ایم ایم ایس سی ایف ڈی کر لی گئی ہے، جس کے نتیجے میں اضافی 5 ایم ایم ایس سی ایف ڈی گیس، 35 بیرل کنڈینسیٹ اور ایک ٹن مائع پیٹرولیم گیس (ایل پی جی) پیدا کی جا رہی ہے۔

یہ پیش رفت پاکستان پٹرولیم لمیٹڈ (پی پی ایل) نے جو گمبٹ ساؤتھ بلاک کا آپریٹر ہے پاکستان اسٹاک ایکسچینج (پی ایس ایکس ) کو منگل کے روز ایک نوٹس میں بتائی۔

پی پی ایل کا اس بلاک میں 65 فیصد ورکنگ انٹرسٹ ہے جبکہ اس کے شراکت دار گورنمنٹ ہولڈنگز (پرائیویٹ) لمیٹڈ (جی ایچ پی ایل) اور ایشیا ریسورسز آئل لمیٹڈ (اے آر او ایل) کے بالترتیب 25 فیصد اور 10 فیصد ورکنگ انٹرسٹ ہیں۔ جی پی ایف ٹو پلانٹ کو ابتدائی طور پر 2016 میں 50 ایم ایم ایس سی ایف ڈی خام گیس (جس میں 26 فیصد کاربن ڈائی آکسائیڈ شامل ہے) کی ڈیزائن صلاحیت کے ساتھ شروع کیا گیا تھا۔

2021-22 میں آپریشنل بہتری کے ذریعے اسے 55 ایم ایم ایس سی ایف ڈی گیس پروسیسنگ کے قابل بنایا گیا تھا۔

کمپنی کے نوٹس کے مطابق کمپنی کے مسلسل عمل بہتر بنانے اور فیڈ میں بہتری لانے کے اقدامات کے تحت اب پلانٹ نے کامیابی سے اپنی پروسیسنگ صلاحیت 60 ایم ایم ایس سی ایف ڈی خام گیس تک بڑھا لی ہے۔

پی پی ایل نے بتایا کہ یہ اضافہ امین سویٹننگ پراسیس میں بہتری کے ذریعے حاصل کیا گیا ہے، جس میں موجودہ ایم ڈی ای اے سالونٹ سسٹم میں ایک خاص اضافی مادہ شامل کیا گیا اور یہ سب بغیر کسی ہارڈ ویئر تبدیلی کے کیا گیا۔

اس کے نتیجے میں تقریباً 5 ایم ایم ایس سی ایف ڈی گیس، 35 بیرل یومیہ کنڈینسیٹ اور ایک میٹرک ٹن ایل پی جی کی اضافی پیداوار ممکن ہوئی ہے، جو کمپنی کے آپریشنل برتری اور وسائل کے زیادہ سے زیادہ استعمال کے عزم کو ظاہر کرتی ہے۔

یہ کامیابی کمپنی کی مسلسل کوششوں کا نتیجہ ہے ،تاکہ موجودہ فیلڈز سے ملکی ہائیڈرو کاربن پیداوار کو کم لاگت میں بڑھایا جا سکے۔

پی پی ایل نے کہا کہ یہ ترقی انتہائی کم لاگت کے ساتھ حاصل کی گئی ہے، جو اسٹیک ہولڈرز کے لیے قدر میں اضافے پر کمپنی کی توجہ کو ظاہر کرتی ہے۔