نائیجیریا میں امریکی فوجی کارروائی یا فضائی حملے ممکن ہیں، ٹرمپ کا اعلان

امریکی صدر ڈونلڈ ٹرمپ نے ایئرفورس ون میں صحافیوں سے گفتگو کرتے ہوئے کہا کہ امریکہ نائیجیریا میں بڑی تعداد میں عیسائیوں کے قتل کو روکنے کے لیے وہاں فوج بھیجنے یا فضائی حملے کرنے پر غور کر رہا ہے۔

جب ان سے پوچھا گیا کہ آیا وہ نائیجیریا میں زمینی فوج بھیجنے یا فضائی حملوں کا ارادہ رکھتے ہیں تو ٹرمپ نے جواب دیا کہ ممکن ہے۔ میرا مطلب ہے، اور بھی کئی امکانات ہیں۔ میں بہت سی چیزوں کا تصور کرتا ہوں۔ وہ نائیجیریا میں ریکارڈ تعداد میں عیسائیوں کو قتل کر رہے ہیں، وہ عیسائیوں کو مار رہے ہیں، بہت بڑی تعداد میں مار رہے ہیں۔ ہم ایسا ہونے نہیں دیں گے۔

ٹرمپ نے یہ بیان اتوار کی شام فلوریڈا میں ویک اینڈ گزارنے کے بعد واشنگٹن واپسی کے دوران دیا۔

اس سے ایک روز قبل، ہفتے کے دن انہوں نے نائیجیریا کے خلاف فوجی کارروائی کی دھمکی دی تھی اگر اس ملک نے عیسائیوں کے قتل پر قابو پانے کے لیے سخت اقدامات نہ کیے۔

امریکی صدر کی فوجی کارروائی کی دھمکی اس وقت سامنے آئی جب ان کی انتظامیہ نے نائیجیریا کو دوبارہ اُن ممالک کی فہرست میں شامل کر دیا جنہیں مذہبی آزادیوں کی سنگین خلاف ورزی کرنے والے ممالک قرار دیا گیا ہے۔

اس فہرست میں دیگر ممالک میں چین، میانمار، شمالی کوریا، روس اور پاکستان بھی شامل ہیں۔