آزاد صحافت مضبوط اور شفاف پاکستان کی ضمانت ہے ، شہباز شریف

وزیر اعظم شہباز شریف نے کہا ہے کہ حکومت آزادی صحافت کے تحفظ اور صحافیوں کے لیے محفوظ ماحول یقینی بنانے کے لیے پُرعزم ہے۔

صحافیوں کے خلاف جرائم سے استثنیٰ کے خاتمے کے عالمی دن کے موقع پر اپنے پیغام میں انہوں نے مزید کہا کہ آزاد صحافت ایک مضبوط، شفاف اور جمہوری پاکستان کی ضمانت ہے۔

انہوں نے کہا کہ آج کا دن اس بات کی یاد دہانی کراتا ہے کہ ایک آزاد، باخبر اور ذمہ دار صحافت کسی بھی جمہوری معاشرے کی بنیاد ہوتی ہے۔

صحافی عوام کو حقائق تک رسائی فراہم کرتے ہیں اور سچائی کے علمبردار بن کر کھڑے ہوتے ہیں۔

وزیراعظم آفس کے میڈیا وِنگ کے مطابق انہوں نے کہا کہ پیشہ ورانہ فرائض کی انجام دہی کے دوران صحافیوں پر تشدد، دھمکیوں یا انتقامی کارروائی کے واقعات دراصل آزادیِ اظہار پر حملے ہیں۔

اس موقع پر وزیراعظم نے اُن تمام صحافیوں کو خراجِ تحسین پیش کیا جنہوں نے سچ اور انصاف کی تلاش میں مشکلات برداشت کیں اور اُن صحافیوں، لکھاریوں اور میڈیا کارکنوں کے اہلِ خانہ سے اظہارِ یکجہتی کیا جنہوں نے فرائض کی انجام دہی کے دوران جانیں قربان کیں۔

انہوں نے مزید زور دے کر کہا کہ ہم صحافیوں کے خلاف جرائم کی مؤثر تحقیقات، انصاف کی فراہمی اور مجرموں کے خلاف قانونی کارروائی کو یقینی بنانے کے لیے تمام ضروری اقدامات کریں گے۔

وزیراعظم نے بین الاقوامی برادری، میڈیا تنظیموں اور سول سوسائٹی پر زور دیا کہ وہ صحافیوں کے تحفظ اور آزادیِ اظہار کے فروغ کے لیے اپنا کردار ادا کریں۔