کینیڈین وزیراعظم نے ریگن اشتہار پر ٹرمپ سے معافی مانگ لی

کینیڈا کے وزیرِاعظم مارک کارنی نے کہا ہے کہ انہوں نے امریکی صدر ڈونلڈ ٹرمپ سے ایک اینٹی ٹیرف پولیٹیکل ایڈورٹائزنگ پر ذاتی طور پر معافی مانگی اور اونٹاریو کے وزیرِاعلیٰ ڈوگ فورڈ کو ہدایت کی کہ وہ اس اشتہار کو نشر نہ کریں۔

مارک کارنی نے جنوبی کوریا میں ایشیا-پیسیفک سمٹ میں شرکت کے بعد رپورٹرز سے گفتگو کرتے ہوئے بتایا کہ بدھ کو جنوبی کوریا کے صدر کی میزبانی میں ہونے والے عشائیے کے دوران انہوں نے صدر ٹرمپ سے معافی مانگی تھی۔ انہوں نے تصدیق کی کہ انہوں نے اشتہار نشر ہونے سے پہلے فورڈ کے ساتھ اس کا جائزہ لیا تھا، لیکن انہوں نے اس کے استعمال کی مخالفت کی اور فورڈ کو واضح کر دیا کہ وہ اس اشتہار کو آگے نہیں بڑھانا چاہتے۔

یہ اشتہار فورڈ کے ذریعہ تیار کیا گیا تھا، جو کنزرویٹو سیاستدان ہیں اور جنہیں بعض اوقات ٹرمپ سے تشبیہ دی جاتی ہے۔ اشتہار میں ریپبلکن آئیکن اور سابق صدر رونلڈ ریگن کا اقتباس شامل تھا جس میں کہا گیا کہ محصولات (ٹیرف) تجارتی جنگوں اور اقتصادی تباہی کا سبب بنتے ہیں۔

جواب میں ٹرمپ نے اعلان کیا کہ وہ کینیڈا سے درآمد ہونے والی اشیاء پر محصولات میں اضافہ کر رہے ہیں اور واشنگٹن نے کینیڈا کے ساتھ تجارتی مذاکرات بھی روک دیے ہیں۔ اس ہفتے کے آغاز میں جنوبی کوریا سے روانگی کے موقع پر ٹرمپ نے کہا کہ اس نے اس ڈنر میں کارنی کے ساتھ بہت خوشگوار گفتگو کی لیکن تفصیلات بیان نہیں کیں۔ جمعہ کو بھی ٹرمپ نے واضح کیا کہ امریکہ اور کینیڈا تجارتی مذاکرات دوبارہ شروع نہیں کریں گے۔

کارنی نے بتایا کہ جمعہ کو چینی صدر شی جن پنگ کے ساتھ ہونے والے مذاکرات تعلقات میں ایک اہم موڑ ثابت ہوئے، جو برسوں کی کشیدگی کے بعد مثبت پیش رفت کی علامت ہیں۔