ٹیلی نار کا پاکستان سے انخلا کے عمل میں بڑی پیشرفت، سی سی پی سے پہلی منظوری مل گئی

ٹیلی نار گروپ نے کہا ہے کہ پاکستان سے جاری انخلا کے عمل کے دوران مسابقتی کمیشن آف پاکستان (سی سی پی) سے پہلی منظوری حاصل کر لی گئی ہے، تاہم ٹرانزیکشن کے متوقع اختتام میں 2026 تک تاخیر کا امکان ہے۔

گروپ نے اپنی تیسری سہ ماہی رپورٹ میں بتایا کہ پاکستان میں معاشی اشاریوں میں معمولی بہتری دیکھی گئی، تاہم معیشت اب بھی بیرونی جھٹکوں اور سیاسی عدم استحکام کے خطرات سے دوچار ہے۔

ٹیلی نار نے دسمبر 2023 میں پاکستان ٹیلی کمیونیکیشن کمپنی لمیٹڈ (پی ٹی سی ایل) کو اپنے پاکستان کے ٹیلی کام آپریشنز کے 100 فیصد حصص فروخت کرنے کا معاہدہ کیا تھا۔ 30 ستمبر 2025 کو سی سی پی نے اس سودے کی منظوری دے دی، جس کے بعد ٹیلی نار نے لین دین کی تکمیل کے لیے پاکستان ٹیلی کمیونیکیشن اتھارٹی (پی ٹی اے) سے حتمی منظوری کے حصول کا عمل شروع کر دیا ہے۔

ٹیلی نار پاکستان کو فی الحال غیر جاری آپریشن (ڈسکنٹی نیوڈ آپریشن) کے طور پر ظاہر نہیں کیا گیا کیونکہ اس معاہدے سے منسلک باقی ریگولیٹری منظوریوں اور دیگر شرائط و ضوابط سے متعلق غیر یقینی صورتحال برقرار ہے۔

ٹیلی نار گروپ نے کہا کہ ہمیں توقع ہے کہ آنے والے مہینوں میں باقی منظوریات حاصل کر لی جائیں گی۔ حکام کی جانب سے پہلی منظوری پاکستان میں جاری انخلا کے عمل کے سلسلے میں موصول ہو چکی ہے، اگرچہ ہم اس سنگ میل کے بعد عمل کے تیز تر ہونے کی توقع کرتے ہیں، تاہم لین دین کی تکمیل ممکنہ طور پر 2026 تک مؤخر ہو سکتی ہے۔

کاپی رائٹ بزنس ریکارڈر 2025