غزہ میں جنگ بندی برقرار، اسرائیل کو حملے کی صورت میں جوابی کارروائی کا حق حاصل، ٹرمپ

امریکی صدر ڈونلڈ ٹرمپ نے بدھ کو کہا کہ غزہ میں امریکہ کی حمایت یافتہ جنگ بندی خطرے میں نہیں ہے، حالانکہ مقامی حکام نے اسرائیلی حملوں میں 26 افراد کے شہید ہونے کی اطلاع دی ہے۔ دریں اثنا اسرائیل اور حماس نے ایک دوسرے پر تشدد کے الزامات عائد کیے۔

اسرائیل نے منگل کو حماس پر جنگ بندی کی خلاف ورزی کا الزام عائد کرنے کے بعد غزہ پر فضائی حملے کیے، یہ حالیہ تشدد امریکی صدر ٹرمپ کی ثالثی میں ہونے والے تین ہفتے پرانے معاہدے میں تازہ ترین واقعہ ہے۔

غزہ کے محکمہ صحت کے حکام کے مطابق ان فضائی حملوں میں کم از کم 26 افراد شہید ہوئے جس میں 5 افراد وسطی غزہ میں برج البریج پناہ گزین کیمپ میں ایک مکان پر حملے میں، چار افراد غزہ شہر کے صبرہ محلے میں ایک عمارت پر حملے میں اور پانچ افراد خان یونس میں ایک گاڑی پر حملے میں شہید ہوئے۔

صدر ٹرمپ نے ایئر فورس ون میں صحافیوں سےگفتگو کرتے ہوئے کہا کہ جیسا کہ میں سمجھتا ہوں انہوں نے (حماس نے) ایک اسرائیلی فوجی کو نشانہ بنایا، لہذا اسرائیلیوں نے جوابی حملہ کیا اور انہیں ایسا ہی کرنا چاہیے تھا۔ جب ایسا ہو، تو انہیں جوابی حملہ کرنا چاہیے۔

ٹرمپ نے زور دے کر کہا کہ جنگ بندی کو کوئی خطرہ لاحق نہیں ہوگا، آپ کو یہ سمجھنا ہوگا کہ حماس مشرق وسطیٰ میں امن کا ایک بہت چھوٹا حصہ ہے، انہیں مناسب رویہ اختیار کرنا ہوگا۔

عینی شاہدین کے مطابق اسرائیلی طیاروں کی بمباری بدھ کی صبح تک غزہ پٹی کے مختلف علاقوں میں جاری رہی۔

اسرائیلی فوج نے فوری طور پر ان حملوں پر کوئی تبصرہ نہیں کیا، جو وزیر اعظم بنجمن نیتن یاہو کے دفتر سے جاری ہونے والے ایک بیان کے بعد کیے گئے، جس میں کہا گیا تھا کہ انہوں نے فوری طاقتور حملوں کا حکم دے دیا ہے۔

بیان میں حملوں کی کوئی واضح وجہ نہیں بتائی گئی، تاہم ایک اسرائیلی فوجی عہدیدار نے کہا کہ حماس نے اسرائیلی کنٹرول والے علاقے میں اسرائیلی افواج پر حملہ کرکے جنگ بندی کی خلاف ورزی کی ہے۔ عہدیدار نے کہا کہ یہ جنگ بندی کی ایک اور کھلی خلاف ورزی ہے۔

امریکا کی حمایت یافتہ جنگ بندی کا معاہدہ 10 اکتوبر کو نافذ ہوا تھا جس کے نتیجے میں وہ جنگ رک گئی جو 7 اکتوبر 2023 کو اسرائیل پر حماس کے مہلک حملوں کے بعد شروع ہوئی تھی۔ دونوں فریقین ایک دوسرے پر جنگ بندی کی خلاف ورزی کے الزامات لگا رہے ہیں۔