ملکی مجموعی ذخائر ریکارڈ سطح پر، سونے کی قیمتوں میں اضافے سے بیرونی مالی اثاثے مضبوط

ٹاپ لائن سیکیورٹیز کے سی ای او محمد سہیل نے کہا ہے کہ رواں سال 2025ء میں اب تک سونے کی عالمی قیمتوں میں 50 فیصد سے زائد اضافہ پاکستان کے ذخائر کے لیے خوش آئند ثابت ہو رہا ہے اور سرکاری تخمینوں کے مطابق پاکستان کے سونے کے ذخائر کی مالیت تقریباً 9 ارب ڈالر تک بڑھ گئی ہے۔

محمد سہیل نے سوشل میڈیا پلیٹ فارم ایکس پر کہا کہ اس اضافے نے ملک کے کل ذخائر جن میں نقد غیرملکی زر مبادلہ بھی شامل ہے کو تقریباً 23 ارب ڈالر تک پہنچا دیا ہے جو کہ تاریخی سطح کے قریب ہے۔

یہ تبدیلی پاکستان کے ذخائر کی ساخت میں نمایاں موڑ کی علامت ہے۔ تاریخی طور پر گزشتہ دہائی میں سونے نے ملک کے کل نقد ذخائر کا تقریباً ایک تہائی حصہ بنایا تھا۔

محمد سہیل نے مزید کہا کہ اب یہ تقریباً دو تہائی کے قریب ہے، یہ ایک بڑی تبدیلی ہے جو ظاہر کرتی ہے کہ عالمی سطح پر سونے کی مضبوطی پاکستان کے خارجی مالی ذخائر کو کس حد تک مستحکم کر رہی ہے۔

اسٹیٹ بینک کے مطابق پاکستان کے مجموعی زرمبادلہ ذخائر 19.81 ارب ڈالر پر موجود ہیں۔

دریں اثنا سونے کی قیمتیں بڑھتی ہوئی عالمی سیاسی کشیدگی کے باعث حالیہ دنوں میں بلند ترین سطح پر پہنچ گئی ہیں۔

زاریہ کے بانی اور سی ای او عادل سلیم نے اپنے ہفتہ وار نیوز لیٹر میں لکھا کہ دنیا بھر میں سونا اور چاندی کم مقدار میں دستیاب ہیں۔

عادل سلیم کے مطابق دستیاب دھات پر دباؤ قیمتوں کو بڑھا رہا ہے جبکہ سرمایہ کاروں کی پوزیشننگ ابھی بھی محتاط نظر آ رہی ہے۔ اسی دوران ایکسچینج ٹریڈڈ فنڈز کے ذریعے سونے کی طلب میں اضافہ جاری ہے جس سے عالمی خزانے سے لیکو یڈٹی خارج ہو رہی ہے۔

سونے کے علاوہ پاکستان میں چاندی کی قیمتوں نے بھی گزشتہ تین ماہ میں نمایاں اضافہ دیکھا ہے جو عالمی سطح پر سیاسی کشیدگی اور سرمایہ کاروں کی طلب کی وجہ سے اوپر جانے والے رجحان کے ساتھ قریب سے مطابقت رکھتی ہے۔

مقامی مارکیٹ میں چاندی 27 فیصد بڑھ گئی جو ایک ہفتے کے دوران 4,012.76 روپے سے بڑھ کر 5,100 روپے فی تولہ ہو گئی جب کہ عالمی سطح پر اسی عرصے میں قیمتیں 32.9 فیصد بڑھ کر 50 ڈالر فی اونس سے زائد ٹریڈ کر رہی ہیں۔